Марий Элын Республиканский наркологический диспансерже потребитель-влаклан шуко гана пайдаланаш лийме 2,5 тӱжем медицине маскым темлен.
Наркодиспансерын Куяр посёлкышто верланыше отделенийыштыже медицине реабилитацийым эртыме деч вара химий дене кылдалтше пациент-влак тичмаш илышыш да паша радамыш пӧртылыт. Тиде программым нунылан «Виктория плюс» автономный коммерческий огыл организаций ямдылен.
Тичмаш илышыш спиртан йӱыш да наркотик деч посна пӧртылшӧ-влак наркодиспансерын мастерскойыштыжо вакшыш шартышым, халатым да у коронавирус инфекцийын пандемийже жапыште поснак кӱлешан медицине маскым ургат.
Продукций наркодиспансерын подразделенийже, медицине да моло профилян организаций-влаклан палемдалтын.
М.ИВАНОВА
