Оршанке муниципал район администрацийым вуйлатышылан Ленар Балтаевым шогалтыме.
18 августышто Оршанке районысо депутат-влак погынымашын коло кокымшо сессийже эртен. Заседанийыште Марий Эл правительстве председательын икымше алмаштышыже Евгений Курмаев, Кугыжаныш Погынын председательже Михаил Васютин, регионын элгӧргӧ политике министрже Антон Мирбадалев участвоватленыт.
Сессийыште Оршанке районысо администрацийым вуйлатышын должностьышкыжо темлыме кок кандидатурым онченыт. Претендент-шамыч кундемым вияҥдыме программышт дене палдареныт да йодыш-влаклан вашештеныт.
Йӱклымашым иктешлыме почеш депутат-шамыч администрацийым вуйлатышылан Ленар Балтаевым пеҥгыдемденыт.
Ленар Маликович Балтаев 1980 ий 5 февральыште Пермь область Бардымский район Барда селаште шочын. Ешын Марий Элыш куснымекыже, Оршанке районышто тунемын. Марий кугыжаныш университет деч вара банк сферыште ыштен, 2017-2025 ийлаште Медведево район администрацийым вуйлатышын алмаштышыже лийын, 2025 ийыште Чуваш Республикын ялозанлык министржын алмаштышыжлан тыршен, 2026 ий февраль гыч Оршанке муниципал район администрацийым вуйлатышын пашажым жаплан шуктен.
Депутат-шамыч ончылно выступатлымыж годым Ленар Балтаев Оршанке районысо администрацийым вуйлатышын должностьыштыжо кундемым вияҥдыме, калыкын илышыжым саемдыме, специальный военный операцийын участникше-шамычлан полшымо пашам тӱҥ семын палемден.
Маргарита ИВАНОВА.
Оршанке муниципал район администрацийын фотожо.
