2 декабрьыште Йошкар-Олаште «Курым-влакын келшен йоҥгалтмышт» («Созвучие веков») этнофорум эртен. Тений тудо кумшо гана лийын.
Организаторышт – «Марий тӱр рӱдер» ден «Энсай» салон. Уна-влак тӱрлӧ кундем гыч марий калыкын вургемжым, сӧрастарышыжым конденыт. Тылеч посна калык вургемым аралыме шотышто видеопрезентацийым ужаш лийын, тыгак мастер-класс-влакым ончыктеныт.
Этнофорумым Марий Эл Правительстве председательын икымше алмаштышыже Михаил Васютин почын. Нуно кидмастар Ираида Степанова дене кажне кундем гыч толшо кидмастар дене мутланеныт, кажне ончер дене палыме лийыныт. Поснак Михаил Зиновьевичын. ош вынер гыч ыштыме тошто марий калык вургемым кидыш налмекыже, «пуйто шочмо ялыш пӧртыльым» манмыже чонышто поро шижмашым шочыктыш.
Этнофорумышто икмыняр гана шке усталыкыштым ончыктышо кидмастар-влак дене пырля икымше гана шке мастарлыкышт дене палдарыше-шамычат лийыныт.
Гармоньчо-влак Олег Бакутов, Андрей Купсольцев, Геннадий Пирогов мероприятийыш погынышо-влакым мурен куштыктеныт. «Визым вел» фольклор ансамбль кумылым нӧлтен.
Этнофорумышто вургем ден сӧрастарыш деч посна шке кид дене ыштыме шоколадымат тамлаш йӧн лийын. Йошкар-Ола гыч авторский шоколадым ыштыше Анастасия Волкован тамле сийже шукыштын кумылыштым савырен. Советский район гыч Галина Волкова калык вургем дене гына огыл палдарен, тыгак шудо чайым йӱктен, уржа ложаш гыч кӱэштме когыльым, мелнам шунен-шунен пукшен.
Пошкырт кундем гыч Лидия Яшкузина йыдалым пидын,эсогыл ты акрет йолчиемжым чиен, кушталтенат колтен. Тудо, йыдал ынже нӧрӧ манын, тӱжвачын пундашыш пу паҥгам пижыктен. Умбачын ончалат гын, япон калыкын йолчиемжым ушештара.
У Торъял район гыч кидмастар Эчан Иванов воштыр гыч ыштыме оҥгым да тудым ший сакышлан келыштарымыжым ончыктыш. Курыкмарий район Йоласал усталык пӧрт гыч Клавдия Иванова ден Надежда Тихомирова изи станокышто потам куэныт.
Санкт-Петербург гыч тӱрлызӧ Юрий Брутов тошто курыкмарий вургемым чийыме радам нерген ончыч фойеште, а вара сценыште видеопрезентацийыштыже ончыктен. Тудо шарпаным, нашмакым чын чияш, тыгак вуйоҥгым,пылышсакышым чийыме годым ожно шовыч дене пылышым петырен огытыл манын умылтарен.
Концертым Марий Турек район гыч «Савак кундем» ансамбль почын. Мордовий гыч кидмастар Татьяна Гвоздева Ираида Степановалан мордва калыкын сӱан леведышыжым пӧлеклен. Свердловск область гыч Марий Карши ял гыч «Ший памаш» ансамбльын участникше-влак урал марий-влакын вургемыштым чиеныт да шке велысе куштымашыштым ончыктеныт.
Шернур гыч туныктышо Анастасия Глазырина шымакшым чийыме акрет йӱлам ончыктен. Уржум гыч Алевтина Курочкинан Регина ден Ангелина уныкаже-влакын моторын куштен мурымышт ончаш погынышо калыкын кумылжым савырен.
Виче кундем Малмыж район Кугу Кетек ял клубын «Шӱдыр» ансамбльжын самырык куштызыжо-шамыч поснак куандарышт. Ансамбльым Ирина Кошкина вуйлата.
Ӱшаныме шуэш, тиде этнофорум калыкнан тӱвыражым, йӱлажым арален кодымаште кугу надырым ышта. Кушкын толшо тукымна шке йылмыж дене мутланаш, марий вургемым чияш, марий улмышт дене кугешнаш тӱҥалеш.
М.СКОБЕЛЕВ
Авторын фотожо
