8 май – Текстиль ден куштылго промышленность пашаеҥ-вакын кечышт.
Вургемым налаш пытартыш жапыште нимогай нелылык уке. Чонлан келшыше чиемым ончыч утларакше кевытыште, пазарыште налыныт, а пытартыш жапыште шукынжо интернет кевытлан эҥертат.
Те, йолташ-влак, вургемым кушто налыда? Ургыктышаш чиемдан модельжым ямдылаш кӧ полша?
Евгения КОШКИНА, кидмастар, этноблогер (Волжский район):
– Вургемым онлайн площадкылаште налам, но утларакшым шкеак ямдылем. Шке пидме чиемлан келшыше сӧрастарышым ыштем. Тыге тудо эшеат моторрак лиеш.
Пытартыш жапыште шке пидме вургем утларак йодмашан. Адакшым марий тамгам келыштарен пидмат ойыртемым пурта, садлан йодшо-влак улыт.
Надежда АКИЕВА, кидмастар, мурызо:
– Вургемым кевытыштат, маркетплейсыштат налам, шкеат ургем.
Кажне кечын чийыме вургемыштат марий тӱрым кучылташ йӧратем. Но тидланже, содыки, мастарлык кӱлеш. Пайремыште марий тӱран вургем нигӧм ок ӧрыктаре, а кече еда чийыме вургемыш тӱрым вес семын кучылтман. Тидым шот дене ышташ гын, эксклюзивный вургем лектеш. Тыгайым мый пеш йӧратем. Яра жапем шукырак лиеш гын, пӱтынь гардеробем шкеак ургем ыле. Но кызытеш тыгай поянлыкем уке.
Марина ИПАКОВА, МарНИИЯЛИ-н вӱдышӧ шанче пашаеҥже, филологий науко кандидат:
– Кумыл волымо годым ӱдырамашлан шопинг манмым ыштыме полша. Тыгай годым мыламат кевытыште кошташ келша. Садланак, очыни, вургемым мый кевытыште налам, а интернет йӧн полшымо дене огыл.
Шкемын капкыллан келшыше чиемым шукертсек ургыктен омыл. Мутлан, тувырым ургыктем гын, модельжым шкеак сӱретлен ончыктем ыле.
Кристина БЫКОВА, МарГУ-н студенткыже:
– Вургемым налаш шукыж годым интернет кевыт дене пайдаланем. Ургыктышаш вургемын модельжым ямдылаш мыланем кокам полша. Тудо жапше годым ургызо специальностьым налын.
Светлана АЛЕКСАНДРОВА, Медведево посёлкысо 2-№ан «Солнышко» йочасадын воспитательже:
– Кызытсе саманыште вургемым налаш нимогай нелылык уке. «Компьютеризаций» манметым вурсена гынат, адак кӱлешлыкшат уло: интернет кевытет полыш «кидшым шуялта». Тыге ме шуко тӱрлӧ кевытыш вургемым кычалын огына кошт, яра жапат аныклалтеш. Вет кажне кечын пашаште улмо годым каныш кечым мӧҥгыштӧ еш дене эртарыме шуэш. Адакшым акшат пашадарлан келшышыла чучеш, да торашкат коштмо огеш кӱл. Иктым веле огыл, икмыняр тӱрлым вет кондыкташ лиеш. Миет, висалтет да налынат толат. Ийготан-влакше чылажым умылен огына шукто гынат, самырык-шамыч почеш «нушкаш» тӧчена. Мом ыштет, илыш тидым йодеш. Мый гын чыла тиде шотышто ӱдыремлан тауштем. Илыш йодмо почеш чияш тудо кумылаҥден шога.
Эльвира ТРИФОНОВА, Марий Эл культурын сулло пашаеҥже, мурызо:
– Ятыр ий ик ургызыланак вел вургемым ургыктем. Тыге тудо ойыртемалтше лиеш да капкылланат келшен толеш. А чиемын могай лийшашыжым шкеак шонен ямдылем да ургыземлан каласем.
Алевтина Байкова ямдылен
Фотом Н.Акиеван альбомжо гыч налме
