КУЛЬТУР ДА ИСКУССТВО

Еш-тукым-влак чумыргеныт

Кугарнян, 22 мартыште, У Торъял поселкысо тӱвыра да каныме рӱдерыште еш-тукым фольклор коллектив-влакын «Творцы и хранители» районный фестивальышт эртыш.

Тушко кажне тӱвыра пӧрт ден клуб посна еш коллективым лукшаш ыле. Но тӱрлӧ амаллан кӧра ты гана тӱҥ номинацийыште ныл еш веле мастарлыкшым ончыктыш — тиде Рыбаковмыт (У Торъял тӱвыра да каныме рӱдер), Домрачевмыт (Элембай тӱвыра пӧрт), Порошинмыт (Кугу Лумарий тӱвыра пӧрт) да Мартыновмыт (Овалже тӱвыра пӧрт).

Тыгодым «Детки и предки» фотовыставке ден «Еш династий» кидпаша ончерыш вес еш-влакат ушненыт ыле. Мутлан, Чӱксола гыч Соколовмыт, Тушнур гыч Новиковмыт, Токтарсола гыч Веселовмыт чолгалыкым ончыктеныт. Кажныжын ямдылен кондымо пашажым тӱсленак ончаш кумыл лектын – нуно тунар ойыртемалтше улыт ыле.

А еш-тукым ансамбль-влак молгунамсе семынак шке мастарлыкыштым тӱрлӧ йӧн дене ончыктышт. Мутлан, Порошинмыт «Ваш келшалын илена» музыкальный композицийым ямдыленыт ыле да мурен куштышт. Мартыновмыт еш икшыве кошташ тӱҥалме, Рыбаковмыт «Аван пайремже» йӱла ужашым, Домрачевмыт «Мӱй спас» пайрем ужашым ончыктышт.

Районысо фестивальыште Порошинмыт ден Домрачевмыт еш-влакым ойыртемалтше семын палемдышт. Нунак ынде тений кокымшо гана лийшаш «Творцы и хранители» регион-влак кокласе фестивальыште У Торъял районын чапшым аралаш тӱҥалыт.

Любовь Камалетдинова.

Опубликовать в Одноклассники

Добавить комментарий