21 числаште XXI фестиваль
Кызыт республикыштына «Театральный Йошкар-Ола» фестиваль кая. Тений тудо коло икымше гана шкенан республикысе профессиональный театр-влакым иквереш уша. Фестиваль жапыште куд театр да ик усталык ушем мастарлыкым ончыкта. Республикнан рӱдолаштыже илыше да тудын унаже-влак 8 спектакльым ончен кертыт. Коллектив-влакын пашаштым жюри: Тӱвыра, печать да калык-влакын пашашт шотышто министрын икымше алмаштышыже Владимир Актанаев (председатель), театр критик-влак Нина Ефимова (Йошкар-Ола), Владимир Спешков (Челябинск), Александр Иняхин (Москва), Василина Мартемьяк (США) акла. Тӱрлӧ номинацийыште сеҥыше-влакым 27 мартыште, Тӱнямбалсе театрын кечыжлан пӧлеклалтше мероприятийыште палемдат да тунамак эн уста актёр-влаклан Йыван Кырла лӱмеш театр премийым кучыкташ тӱҥалыт.
21 мартыште Э.Сапаев лӱмеш опер да балет театрыште “Театральный Йошкар-Ола» фестивальым торжественно почмаш эртен.
— XXI фестиваль 21 мартыште почылтеш. Кечыжат лачеш толын, — палемдыш Правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютин. — Кодшо арняште Россий Федерацийысе театр-влакын пашаштым иктешлымаш гыч пале лийын: театрыш коштшо-шамычым шотыш налме дене Марий Эл Республикна — кумшо верыште (Санкт-Петербург, Москва деч вара) Сандене Йошкар-Ола — театр ола манын каласаш моткоч келшен толеш.
Э.Сапаев лӱмеш опер да балет театр труппо фестиваль жапыште «Сильва» (И.Кальман) опереттым да «Чиполлино» балетым ончыкта.
«Сильвам» зал тич погынышо калык шокшын вашлийын. Опереттыште тӱҥ рольым, Сильвам, Йыван Кырла лӱмеш театр премийын да тӱнямбал конкурс-влакын лауреатше Наталья Кузьминская чоҥен.
Актрисын тӱжвал сынжат образлан келшен толшо. Йӱкшӧ виян, шке партийжым сайын мура, капкылжат лывырге. Содержаний почеш артист-влак тӱрлӧ вургемым чият. Но Сильван чыла гаяк тувыржо келшен толшо огыл ыле. Тӱтырала койшо ош шикшымат утыждене колтымыла чучо.
Кокымшо ий почела Йошкар-Олаште критик семын пашам ыштыше Владимир Спешковат шке шонымыжым каласыш:
— Кодшо ийысе спектакль-влак сай шарнымашым коденыт. Сандене ты ганат уло кумылын фестивальыш толынам. «Сильва» — кугу паша. Спектакльыште шуко артист модеш, но ала-молан изиш йокрокла чучо.
Спектакльын режиссержо — Сергей Шепелёв. Тудак костюмым ямдылыше сӱретче. Ик еҥлан тынар пашам шукташ куштылгыжак огыл, сандене костюм шотышто ситыдымаш ятыр. Мутлан, тӱҥ рольым модшо-влак Наталья Кузьминская ден Павел Крючко (Эдвин) икте-весылан пешыжак келшен огыт тол. Костюмым ямдылыме годым тиде ситыдымаш деч кораҥаш лиеш ыле, шонем. Павелын прическыжат самырык кугыжалан келшен толшо огыл, лучо парикым чикташ ыле. Тиддеч посна эше икмыняр артистын вургемжым вашталташ кӱлмӧ нерген радамлен Нина Ефимова.
Спектакль мучко сценын шеҥгел ужашыштыже оркестр (дирижержо — Олык Ипай лӱмеш кугыжаныш да Йыван Кырла лӱмеш театр премий-влакын лауреатше Григорий Архипов) шоктен. Музыкант-влакын мастарлыкышт чылам куандарен.
Фестивальын кокымшо кечынже Э.Сапаев лӱмеш опер да балет театр «Чиполлино» балетым, а Йоча да самырык-влаклан театр-рӱдер И.Гончаровын «Обломов» пьесыж почеш «Обломов или Теперь или никогда» спектакльым ончыктен. Пьесым сценылан карел драматург, режиссер Сеппо Кантерво (Сергей Пронин) келыштарен.
А.Байкова.
Е.Никифоровын фотожо.
