Республикыштына «Марий Элын тӱвыраже» (visitmariel.ru) портал пашам ышташ тӱҥалын.
Ты проект Тӱвыра, савыктыш да калык-влакын пашашт шотышто министерствын полшымыж дене илышыш пурталтын.
Тиде сайт республикысе сылне верла дене палыме лияш, турист-влакын коштмо корныштым ужаш да тӱвыра бренд, культур да искусство аланыште лийшашлык мероприятий-влак афише дене палдара.
– Портал тӱвыраште эртаралтше событий, сеҥымаш-влак нерген республикыштына илыше веле огыл, тудын деч ӧрдыштӧ илыше-шамычланат пален налаш йӧным ышта. «Марий Элын тӱвыраже» моткоч ойыртемалтше увер ресурслан шотлалтеш. Тудо тӱрлӧ событий, проект да еҥ-влак нерген материалым кычалын муаш полша, – палемден культур министр Константин Иванов.
Сайтыште ныл ужашым муаш лиеш: «Куда сходить?», «Спецпроекты», «От первого лица», «Я здесь: Марий Эл». Федерал кӱкшытан «Культура РФ» портал дене ушымеке, регионысо тӱвыра репертуарым «Пушкин карт» дене пайдаланыше-влакат ужын кертыт.
– Портал республикыштына тӱвыра, образований да науко аланыште улшо увер дене ик эн ончыч палдара. Тудо кундемышкына толшо-влаклан полышым пуа да регионысо увер дене палдара. Мемнан команде тудым у деч у материал дене жапын-жапын пойдараш тӱҥалеш, – каласен проект вуйлатыше, Т.Евсеев лӱмеш национальный тоштер вуйлатыше Светлана Зверева.
А.Байкова.
