Ноябрь тӱҥалтыште И.Палантай лӱмеш культур да искусство колледж пеленысе «Тулгайык» ансамбль Россий кӱкшытан кок конкурсыш миен коштын да сеҥыше радамыш логалын, увертара республикын Тӱвыра, савыктыш да калык паша шотышто министерствын пресс-службыжо.
1-3 ноябрьыште Ульяновскышто руш мурым мурышо-влаклан «Поющая Россия» конкурс эртен. Тушто ты коллектив духовный шӱлышан деч посна ойган марий мурымат («Жаплан гына кече лектеш») мурен.
«Тулгайыкын» мастарлыкшым жюри кӱкшын аклен.
Конкурсым иктешлымеке, ты коллективым эн сайлан шотленыт да 30 тӱжем теҥге премий дене палемденыт. Тудым Россий Кугыжаныш Думын депутатше Г.Балыхин кучыктен.
А 8-9 ноябрьыште тӱвыра да сымыктыш колледжынак артистше-влак Чебоксарыште этнический музыкым шоктышо-влаклан эртаралтше фестивальыш ушненыт.
Тудо Чуваш автономный областьым ыштымылан 100 ий теммылан пӧлеклалтын. Конкурсышто Чуваш, Марий Эл, Татарстан республикла, Пермь кундем, Тверь область да Моско ола гыч чылаже 11 усталык коллектив мастарлыкым ончыктен.
Мемнан артист-влак киров, урал марий-влакын мурыштым гармонь, тӱмыр почеш йоҥгалтарымышт дене жюри еҥ-влакым сайынак ӧрыктареныт.
А.БАЙКОВА
