Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Надежда Мокеева – «Мый… Тый»
- Светлана Булатова – «Кунам эртен кайыш»
- Володя Матвеев – «Ит кораҥде шинчат»
- Анита Феоктистова – «А тудо»
- Надежда Крылова – «Эргымлан»
- Иван Смирнов – «Ах, шараҥге, ший парча»
- Алексей Милютин – «Йӧратем»
- Данила Коротков – «Ом кӱл тылат»
- Диана Ямбаршева – «Кече модмо годым»
- Анастасия Топаева – «Шере омо»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Пӧлек шотеш – муро
Алексей Милютин Советский район Яҥгранур ялыште шочын, Кукмарийыште кушкын. Кызыт И.С.Палантай лӱмеш тӱвыра да сымыктыш колледжыште кумшо курсышто тунемеш, «драме театр да кино актёр» специальностьым налаш ямдылалтеш.
Изинекак мураш йӧрата, идалыкат пеле ончыч гармоньым шокташ тунемын.
– Репертуарыштем коло наре мурем уло. Гармоньым шоктен, марий такмак-влакым почеш мураш пеш келша, – палдара Алексей. – «Йӧратем» мурылан мутым икымше курсышто тунеммем годым шкеак возенам, Христина Александрова тӧрлаш полшен. Семым уста музыкант Сергей Пчёлкин возен, аранжировкым Михаил Анеев ыштен. Муро йӧратымаш нерген, тудым келшыме ӱдыремлан пӧлекленам.
Алевтина БАЙКОВА
Фотом еш альбом гыч налме
