«Здравоохранений» национальный проектын «Марий Эл Республикын тазалык аралтыш системыжын медицине организацийлаштыже квалифицироватлыме кадрым ситарымаш» регионысо программыжым илышыш пуртымо кышкарыште Йошкар-Оласе медицине колледж пытартыш курсышто шинчымашым погышо студент-влаклан муниципальный образований-шамычын вуйлатышышт дене вашлиймаш-влакым эртара.
Черетан вашлиймаш республикнан ик эн тора кундемыштыже – Юрино посёлкышто – лийын. Тыште врач ден кокла медицине пашаеҥ-влакын ситыдымышт дене кылдалтше йодыш поснак пӱсын шога.
Эмлыме отделенийын нылымше курсыштыжо тунемше ӱдыр-рвезе-влакым Юрино район администрацийын вуйлатышыже Марина Шихова шокшын вашлийын да ончыкылык фельдшер-шамычлан кундемын вияҥмыже, ончыкылыкшо нерген радамын каласкален, тыгак тыште могай шинчымашан медикын кӱлмыжым умылтарен.
Студент-влак Юрино районысо больницыште лийыныт. Тӱҥ врач Надежда Степанова нунылан стационарым ончыктен, тудын паша ойыртемже нерген каласкален, тыгак ончыкыжым кызытсе жаплан келшыше у поликлиникым чоҥаш да Юрино больницын паша коллективышкыже ушнышо медик-шамычлан чыла шотыштат йӧнан пачерым ойыраш палемдыме нерген ойлен.
Район администраций Йошкар-Ола гыч мийыше студент-влаклан Юрино посёлко да Шереметевын замокшо мучко экскурсийым организоватлен.
Кызыт Йошкар-Оласе медицине колледжыште Юрино район гыч шым студент тунемеш. Июль тӱҥалтыште нуно Юриныш мият да, район администрацийым вуйлатыше дене вашлийын, ончыкылык нерген радамын мутланат.
Студент-выпускник-шамыч кокла гыч кудыжо Юрино районым пашам ыштыме да илыме верлан ойырен налеш – кызытеш каласаш неле, но райрӱдыш миен толмо деч вара кум ончыкылык фельдшер верысе администрацийым вуйлатышын да пашам пуышо-влакын мом сӧрымышт шотышто келгын шонаш тӱҥалын.
М.ИВАНОВА
Фотом Марий Элын Тазалык аралтыш министерствыж деч налме
