Тений 2 гыч 5 сентябрь марте Нижегородский областьыште Социальный вашталтыш шотышто лидер-влакын «Территория Ритма» тӱнямбал инклюзивный форумышт лиеш.
Организатор-шамыч шке площадкыштышт Россий да Беларусь Республик гыч социальный бизнесым ышташ, илышым вашталташ, социальный предпринимательстве да инклюзивный лидерстве аланыште вияҥаш шонышо 300 утла чолга участникым вучат.
Мероприятийыште мастер-класс-влакым эртараш, Российын эн сай спикерже, бизнес-тренерже, амалкалчыже-шамычын выступленийыштым колышташ, ончыкылык нерген шӱм вургыж шонышо участник-влакын командыштым чумыраш да наставник-шамычын вуйлатымышт почеш проектлам ямдылаш палемдыме.
Форумын площадкыштыже «Ритмын мастерскойжо-влак» пашам ышташ тӱҥалыт, нуно кызытсе лидерстве, инклюзивный командым чумырымо, маркетинг, проектный да социальный виктем, амалкалчын шонымашыже, искусственный интеллект да нейросетьла дене паша аланлаште практический шинчымаш ден опытым налаш, тыгак ончыкылыкын кӱлешан компетенцийже-шамычым вияҥдаш йӧным ыштат.
Ритмыште Российыште да Беларусь Республикыште илыше 18 ияш деч кугурак ийготан самырык еҥ-влак, ты шотыштак инвалид-шамыч, участвоватлен кертыт.
Форумын площадкыштыже лӱмын туныктымо волонтёр-влак пашам ыштат, да келшыше йырвел лиеш, сандене участник-шамыч нимогай йӧндымылыкым шижшаш огытыл.
Мероприятийыште участвоватлаш кумылан еҥ-влак 10 август марте http://территорияритма.рф. официальный сайтыште йодмашым пуышаш улыт.
Претендент-шамычым конкурс негызеш ойырен налыт. Тудын тӱҥ йодмашыже – шонымашым шукташ тыршымаш, чолгалык, лӱддымылык, тыгак регионын да элык лидерже лияш кумыл.
Форумышто участвоватлымылан тӱлыман огыл, но Нижний Новгород марте да мӧҥгеш шке окса дене коштман.
Мероприятийын тӱҥ организаторжо – Нижегородский инвалид-влакын «Ковчег» региональный мер организацийышт. Форум Россий Федераций правительствын, «У проект-влаклан полшымо шотышто стратегический инициативе-шамычын агенствышт» да «Россий – йӧным ыштыше эл» АНО-влакын полшымышт дене эрта.
«Территория Ритма» тӱнямбал инклюзивный форумышт Марий Эл гычат участник-влакым кумылын ӱжыт.
М.ИВАНОВА
