УВЕР ЙОГЫН

Марий ӱдыр- мисс

25-29 сентябрьыште Коми Республикын рӱдолаштыже, Сыктывкарыште, «Финн-угрий студенчествын миссше» тӱнямбал конкурс эртен. Тушто Марий Эл, Коми, Мордва, Удмурт, Карел республикла, Хант-Мансий автономный округ гыч усталыкым шым ӱдыр ончыктен. 

Сеҥышыш Марий кугыжаныш университетын калыкле тӱвыра да тӱвыра кокласе коммуникаций институтышто (магистратур, 1-ше курс) тунемше Светлана Давыдова лектын.

Светлана Медведево район Краснооктябрьский посёлкышто шочын-кушкын, «Марий Эл»  кугыжаныш ансамбльыште кушта, «Российысе студент шошо» всероссийский фестивальын лауреатше. Тудо конкурсышто мастарлыкшым моткоч сайын почын ончыктен. Ӱдыр дефилеште марий вургемын моторлыкшо дене палдарен, видеовизиткыште шочмо кундемже, шкеж нерген каласкален, калык легенде ден преданийым палымыжым ончыктен, финн-угор калык-влакын модышыштышт писылыкше дене ойыртемалтын, а кушталтымыж дене погынышо ден жюрин кумылжым поснак савырен.  

Жюриште МарГУ-н калыкле тӱвыра да тӱвыра кокласе коммуникаций институтым вуйлатыше Р.Чузаев шинчен. Тыгак Светланан кумылжым университетысе йолташыже-влак да Российысе финн-угор калык-влакын VI погынышкышт мийыше Марий Элын делегатше-влак нӧлтеныт. Республикнан тӱвыра, печать да калык-влакын пашашт шотышто министрже М.Васютинат Светланам сцене гоч кумылаҥден. Очыни, чыла тиде ӱдырлан чолгарак да лӱддымӧ лияшыже полшен.

Ушештарена, икымше тыгай конкурс куд ий ончыч Марий Элыште эртен. 2013 ийыште Саранскыште МарГУ-н студенткыже Виктория Воронцова тыгак «Финн-угрий студенчествын миссше»  лийын. Тыге 2018 ийыште черетан конкурс Йошкар-Олашке уна-влакым вуча.

Л.ШАБДАРОВА.

Опубликовать в Одноклассники

Добавить комментарий