Шлань ялна воктене пилорамысе производствым тӱрыснек шотыш кондымо, ешартыш цехыште вурдым пӧрдымӧ станокым пашаш колтымо. Молыжо тошто семынак, ик кӱкшытыштак ышталтеш. Кызыт ик бригаде чодырам руа, пырням лум шуко вочмешке кондаш шонена. Пилораме кок смене дене ышта. Продукцийым тӱрлӧ вере колтена: Волжскысо кок предприятийыш – мебельлык куэ материалым, Казаньыш – ямде вурдым, Тольяттиш – яшлык ден поддонлык материалым. Клиент-влак велым ӧпке уке.
Мом ышташ шонымо – тӱҥ шотышто шуктымо. Но паша кумыл эре уло – производствым умбакыже вияҥден толман. Сандене шушаш ийыште утларак тыршен ышташ шонена. Шумо кӱкшыт дене гына огына лыплане. Налше-влак продукцийнам вучат, тугеже тудо кӱлеш.
А пашам ышташ таза лийман, черым сеҥен илыман. Ӧрдыжкӧ коштын черланаш огыл манын, шке кундемыште паша верым почман, производствым вияҥдыман. Шке калыклан эҥертен, икте-весым умылен да ваш-ваш полшен гына шонымашке шуаш лиеш. Порылык ден чолгалык эреак пеленда лийышт, ӱшан тулда ынже йӧрӧ! Морко калыклан да уло марий калыклан У ий вашеш тидым тыланен ойлем.
А.И.Оразаев,
индивидуальный предприниматель
