УВЕР ЙОГЫН

«Палынак ончыко тошкалын»

6 ноябрьыште Марий Элым вуйлатыше Александр Евстифеев Звенигово олашке миен да «Оласе средам тачысе кечылан келшышын ыштыме эн сай проект» всероссийский конкурсын проектшым илышыш пуртымо кышкарыште уэмден олмыктымо Юл серым ончалын савырнен.

Республикым вуйлатыше тиде пашам кӱкшын аклен, но тыгодым кок у шарныктыш воктенысе кумдыкым тӱзаташ кӱлмым палемден. А Звенигово олам тачысе кечылан келшышым ыштыме шотышто ончыкылык пашам каҥашыме годым районым вуйлатыше В.Геронтьевлан республикын 100 ияш лӱмгечыж вашеш волгалтарыман 3 км кутышан ече трассым чоҥаш кӱштен. Владимир Евгеньевич тиде пашам тенияк тӱҥалаш, а кеҥежым электротулым шупшаш сӧрен.

Тылеч посна А.Евстифеев Звенигово районын «Культур мозаике: партнер кыл» всероссийский конкурсышто сеҥышыш лекше «Звенигово туризм – мландын вийже» проект кышкарыште почмо турист увер рӱдержын пашаж дене палыме лийын.  Марий Элым вуйлатышын палемдымыж почеш, Провой кундем республикыштына историй да тӱвыра поянлыкше дене ойыртемалтеш, сандене чыла тидым, регионын Молодёжный политике, спорт да туризм министерствыж дене пырля ик турист маршрутым ыштен, турист рынкыш лукташ кӱлеш.

А.Евстифеев оласе канализаций коллекторым олмыктымо пашамат ончен. Ушештарена: тений шошым тушто икмыняр вере мланде волен каен, да канализаций вӱд чарашке лекташ тӱҥалын. Марий Элым вуйлатыше олмыктымо пашалан правительствын резерв фондшо гыч 40 млн. теҥгем ойыраш кӱштен.

Таче кечылан Пушкин уремыште да Пушкинский изуремыште коллекторын аварий лӱдыкшан ужашлажым олмыктымо, но пашам мучашлаш эше напорный манме канализацийын кок линийжым шупшаш кӱлеш. Кызыт у насос станцийым шындат. Канализаций коллекторым уэмден олмыктымо паша вес ийышкат кусна. Тидлан 80 млн. утла теҥгем кучылташ палемдыме.

«Тӱҥжӧ – калыклан йӧнан илышым ышташ, экологий лӱдыкшым кораҥдаш. Тыглайже инженер сетьым уэмдыме шотышто Звенигово район тений палынак ончыко тошкалын», – паша визитшым иктешлен А.Евстифеев.

Марий Элым вуйлатышын организаций да аналитике виктемжын уверже негызеш М.ИВАНОВА ямдылен   

Опубликовать в Одноклассники

Добавить комментарий