Тӱнямбал экономике форум
Кум ийлан сомыл радам
Марий Эл ден Йӱдвел рӱдола коклаште пашам пырля ыштымым вияҥдышашлан 2027 ий марте жаплан сомыл радамым пеҥгыдемдыме.
Тушан Марий Эл вуйлатыше Юрий Зайцев ден Санкт-Петербургын губернаторжо Александр Беглов кидпалым пыштеныт.
Тиде сомыл радамым 2024 ий июньышто сату да экономике, науко да технике, социальный да тӱвыра кыл кучымаш нерген пеҥгыдемдыме соглашений дене келшышын ямдылыме. Тыгай корно карт кок регион коклаште чыла велымат пашам пайдалын ышташ полша.
Ты соглашений почеш тачысе кечылан икмыняр пашам шуктымат. 2024 ий октябрьыште Марий Элын бизнес-миссийже дене лекме, Изи да кокла кугытан бизнесын партнериатыштыже лийме, мемнан эксперт-влак каҥашымаш площадкылаште мутым ойленыт. Тидыже Петербургысо предприятий-влакым мемнан регион велыш мелын савырнаш таратен. «Октябрьский» кугу концерт залыште Калыкын икоян улмыжо кечылан пӧлеклалтше концертыште «Шыжарвла» кӱслезе ансамбль шке мастарлыкшым ончыктен. Марий Элысе бизнеслан могай кугыжаныш полыш пуалтме дене Петербургысо промышленный конгрессыште палдарыме. Санкт-Петербург правительствын полшымыж дене Мраморный залыште «Сеҥымаш кӱсле» проект почеш выступленийым ончыктымо.
Ончылно, тенияк, шагал огыл оҥай вашлиймаш – Россий этнографий тоштерыште «Россий тӱрлем: Марий Эл» выставке, «Россий промышленник» тӱнямбал форум, Петербургысо Россий национальный книгагудо, вуз да тӱвыра учрежденийла дене пашам пырля ыштымаш – вуча.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: Санкт-Петербург дене сомыл радамым пеҥгыдемдыме.
Денис Речкинын фотожо.
