7 майыште Йошкар-Олаште Самырык-влакын полатыштышт «Шарнымаш капсулым» почмылан пӧлеклалтше торжественный мероприятий эртен.
– 2016 ийыште Кугу Отечественный сар тӱҥалмылан 75 ий темме кечын Марий Элысе Элгӧргӧ паша министерствын тыршымыж дене пыштыме тиде капсулым почмаште лияш мылам – кугу чап, – палемден республик вуйлатыше Юрий Зайцев.
«Капсула Памяти» боевой снаряд деч гильзе семын республикысе МВД-н историй тоштерыштыже аралалтын.
Министр Андрей Вырвич каласен:
– Тиде капсул кӱртньӧ ден кагаз гына огыл, а мемнан эрыкна да тыныс кава верч кредалше герой-влакын ойлен кодымо илыше йӱкышт.
Шарнымаш капсулыш правам аралыше органлаште икмыняр лу ий дене тыршыше 12 фронтовикын серышыжым пыштыме. Серышлаштышт ветеран-влак неле сар пагыт, сусыргымышт да уэш фронтыш пӧртылмышт, война деч варасе жап, правам аралыше органлаште пашам ыштымышт нерген каласкаленыт. Тыгак нуно Кугу Отечественный сар, тудо жапысе герой-влак нерген шарнаш, шочмо эл верч тыршен пашам ышташ да тынысле кавам тыланен сереныт.
Марий Эл Республикым вуйлатышын пресс-службыжын уверже негызеш Любовь Камалетдинова ямдылен.
