Йочалан эре пример лийман
Морко район Нурымбал ял гыч Владимир Николаевич ден Маргарита Александровна Николавмыт еш дене палыме лийынна. Нунын суртышт умбачынак моторын коеш, поснак воктен улшо пу пӧрт. Ялышт кугу корно деч умбалне верланен. Сандене тыште шып и ласка.
— Ты кундемыштак шочынам тиде сурт олмыштак 1982 ийыште, армий гыч толынам веле, суртым ыштенам. – шарналтен каласкала суртоза. — Мыланем 20 ий веле лийын.
Ачамын ты тӱня гыч кайымыж деч вара чонлан, мутат уке, неле лийын, но вуйым сакен омыл. Самырык лийнам, паша деч лӱдын омыл, пӧртым чоҥаш пижынам.
Илен-толын, вич икшывым ончен куштенна. Вара тӱҥ сурт пелен эше ик мотор кеҥеж пу пӧртым ыштенна.
Эн ончыч изи кеҥежымсе пӧрт веле лийын. Вара кугурак суртым нӧлтенна. Эрге-шешке-влаклан пеш келша. Нуно унала толмыж годым тушто илат. Вес гана, таза лийына гын тиде кеҥежымсе пӧртым илаш йӧршӧ суртыш савырынена, — мутланымашым шуя Владимир Николаев.
Ача-авалан кум эргыгышт эре полшен шогат! Икте Москваште ила, весыже – Морко посёлкышто, кумшо Йошкар-Олаште пашам ышта.
— Тений пакчаште, садыште, чылажат сайын шочын, тиде моткоч куандара.Тедым ынде сайын илен лектына. Кок шорыкым ончена, чыве, лудо уло. Шӧрым кызыт оксала налына. А эн ончыч кок ушкалым, кок ӱшкыжым кучена ыле. Кызыт вий уке. Кеҥежым садак шудым солена.
— Ялыштына мемнам Опач маныт. Ме Опач тукым гыч улына. Авам могырым гыч Йыван кочаже кочан кочаже Опач Сепан лийын. Ачам могырым Эпатай Йыван лийын. Нунын тукымышт — Эпатай. Ача-ава мемнам сайын ончен куштеныт. Тау нынылан. Меат нунын гай лияш тыршена. Йоча-влакымат тыгак туныктена. Сурт кӧргым, кудывечым арун кучена, нунылан примерым ончыктена, — каласыш Владимир Николаевич.
Сурт-оза шке жапыште колхозышто тыршен, вара чодыраште лесниклан, лесхозыштат ыштен. Озавате доярке лийын, осеменаторлан «Дружба» колхозышто ыштен.
А самырыкше годым Йошкар-Олаште Сомбатхей микрорайонышто Ленин проспектыште икымше пӧртым чоҥымо годым малярлан тыршен. Ынде Николаевмыт сулен налме канышыште улыт.
Ончыкыжым пӧрткӧргым чаткан чиялташ шонем.Моло изирак сомылат эре уло. Юмотазалыкым гына пуыжо, — мане Владимир Николаев.
Ме ӱшанена: тыгай мастар кидан, пашаче еҥын шонен пыштыме пашаже ворана, а вате-марий тазалыкше пеҥыде лиеш.
Тыгай тыланымашым Николаевмытлан каласымек,ме нунын дене порын чеверласышна.
Михаил Скобелев, Лидия Шабдарова
М.Скобелевын фотожо
