Илыш эрта, а тоштер кодеш
Эртыше илышыш пӧртылтышӧ да тудо жапым шарныктарыше тыгай изи тоштерже Провой кундемысе Эсмекплак кундемыште верысе тӱвыра пӧртыштӧ верланен.
— Тошто ӱзгар-шамычлан ме калыкын полшымыж дене кокымшо «шӱлышым» пуэнна, манаш лиеш, — ойла культур полатым вуйлатыше Валентина Вячеславовна Краснова. – Чынжым гын, тымарте нуно клатыште але пулдыр ӱмбалне пуракым поген гына киеныт. А тыште тудым калык ужеш, ончычсо кидмастар-влакын пашаштым аклен кертеш. Тений февральыште ме «Тошто арверым пӧлеклыме кечым» эртаренна. Еҥ-влак тушко кумылын ушненыт да арален кийыктыме ик эн шерге ӱзгарыштым, вургемыштым, тӱрлӧ атым, шагатым рӱжге конденыт. Эсогыл южо арверым ончетат, от умыло – тудын дене мом ыштеныт… Тоштерна дене ме моткоч кугешнена, вет чыла тиде – кугезе калыкнан илышыже. Ожно могай вургемым чиеныт, могай ӱзгарым кучылтыныт – тидым самырык тукымат палышаш.
Чынжымак, тоштерыште мо гына уке: ожнысо кӱнчыла (шӱдырымӧ орва), руш леҥеж, шӱдышан печке (шыдышан вочко), корзиҥга, куымо станлан келыштарыме ӱзгар-шамыч, шовыч, мыжер, шепка, кумыж гыч пидме аралтыш, шыҥалык, малыме верымат ончыктымо, совет годсо арвер-влакат улыт… Калыклан кугу таум ойлаш гына кодеш.
М.СКОБЕЛЕВ
Авторын фотожо.
