Теҥгече паша кечына редакцийыште коллегынам, тӱҥ редакторын алмаштышыже Евгений Садовиным саламлымаш гыч тӱҥалын. Тудо сайлымаш годым эртаралтше «Марий Эл выбирает комфорт» викторине – лотерейыште Шернур сыр заводын лавкышкыже да «Йола» шыл комбинатын кевытышкыже сертификат-влакым модын налын. Изи гынат, куаным кондышо увер.
А тыгай куанже ты викториныште 2234 еҥлан шыргыжалын, лач тынар призым организатор-влак ямдыленыт. Пӧлек коклаште театрыш, мурызо Заран концертышкыже билет, ДНС-ын кевытлашкыже, «Баумаркетыш», «Маркетплейсыш» сертификат-влак, тыгак икмыняр «ушан шагат», «ушан колонко», велосипед, электросамокат, телевизор, ноутбук, холодильник, мотор пуш лийыныт. Тӱҥ призлан «Лада Гранта» кок автомобильымат кажныже модын налаш шонен, очыни. Ик машинаже Козьмодемьянск гыч ӱдырамашлан логалме нерген увер викторинын официальный лаштыкыштыже пуалтынат.
Моло призым модын налше-шамыч нергенат туштак пален налаш лиеш. Мутлан, Медведево район Нурма села гыч марий йылмым туныктышо Любовь Юрьевна Соколовалан моторан пуш логалын. Тушечынак вате-марий Марковмыт мужыр, иктыже ноутбукым, весыже 3 тӱжемлан сертификатым модын налыныт. Районлаштат пиалан-влак шукын лийыныт.
Викторинын йодышыжо-влак Россий президент В.Путинын темлымыж почеш 2017 ий гыч илышыш шыҥдарен толмо «Илыме вер да оласе среда» национальный проектын «Оласе кумдыкым йӧнаным ыштымаш» федерал проект дене кылдалтыныт ыле. Ончыктен кодыман, тиде жапыште мемнан республикыште, программе дене келшышын, 742 кумдыкым тӱзатыме. Тидын шотыштат викториныште йодышыжо лийын. Тенийланат Йошкар-Олаште веле огыл тӱзатышашлык кумдык-влакым ойырышаш улыт. А викторинын ушнышо-влак нине кумдыкымат ойырен налын да йӱклен кертыныт.
Кеч-мо гынат, викторине сынан лотерей модыш калыкнам кожгатен да шукыштым куандарен кертын. Кеч южо-иктыже «тиде лохотрон» манынат ойлен. Но тыглай еҥ-влакын призым модын налмыштым ужын, нунын дене пырля куанаш гына кодын. А кӧ эше шке призшым модын налмыжым терген да налын шуктен огыл, тидым Йошкар-Оласе Гагарин уремын 8-ше номеран пӧртыштыжӧ 211-ше кабинетыште 1 июнь марте ыштен кертеш.
С.Носова
Снимкыште: автомобильым модын налше Александра Петровна призым кучыктымо годым.
Фотом викторинын соцкылысе официал лаштыкше гыч налме.
