9 Май – Сеҥымаш кече!
Куан шинчавӱдан пайрем
9 Майыште ме чыланат Кугу Отечественный сарыште мемнан тыныс илышна верч кучедалше-влакым пагален шарналтена. Ме нуным нигунамат мондышаш огынал, тыгодым шке пашана денат нуным чапландарышаш улына.
Ты кечын мый авамын кугурак изажым Андрей Сергеевич Таныгиным шарналтем. Тудо кок сарыште участвоватлен 1939-1940 ийлаште Совет-финн войнаште лийын да кӱчык жаплан шке шочмо верышкыже, Советский район Марий Нур ялышкыже толын, вара 1941 ийыште Кугу Отечественный сарыш каен, тиде ийынак декабрьыште увер деч посна йомын. Тыгак мыйын кугезе кочам ден чӱчӱм, иза-шольо Данил Павлович ден Кузьма Павлович Скобелевмыт Ленинград фронтеш 1942 ийыште вуйыштым пыштеныт. Ме ешыштына тиде Сеҥымаш могай ак дене пуалтмым огына мондо.
А теве тиде фотом 2016 майыште войзымо. Тушто ветеран Василий Михайлович Петровым ужыда. Тудын дене мылам шке жапыштыже мутланаш логалын.
Тудо тунам тыге каласен: «Ме кужу илышым иленна. Чыла ужынна, чытенна. Ончалза, элнаже могай! Руш да моло калык дене пырля тушманым, фашист-влакым сеҥенна! Таче ме тыгай сылне пайремым, 9 Майым, пайремлена. Тиде чынжымак волгыдо, куан шинчавӱдан пайрем! А тыланда, самырык тукымлан, мемнан семынак элнам йӧраташ, кӱлеш лиеш гын, тудым кеч-могай тушман деч аралаш ямде лийшаш улыда манын сугынь мутем ойлем».
М.СКОБЕЛЕВ
Авторын фотожо
