Марий Эл Республикын Социальный вияҥмаш министерствыжын ведомствышкыжо пурышо социальный обслуживанийын стационар организацийлаштыже илыше инвалид ден илалше еҥ-влакын республик кӱкшытан Художественный самодеятельность фестивальышт эртен.
Фестивальын программыже моткоч поян лийын. Кидпаша ончер шӱртӧ да шер дене пидме арверже, оригами йӧн дене келыштарыме модышыжо, алмаз тӱржӧ, сылне сӱретше-влак дене ойыртемалтын. А коллектив, посна еҥ-влакын сылне да оҥай номерышт кажнын кумылжым нӧлтен.
Жюриште социальный вияҥмаш министр О.Фёдорова, алмаштышыже А.Компаниец, инвалид организаций-влакын еҥышт А.Грозова, В.Ахрамеев, Н.Богомолова, О.Ребко, Марий кугыжаныш университетын вияҥме да шинчымашым пуымо психологий кафедрыжын профессоржо Н.Морова да молат лийыныт.
Фестивальын участникше-влак «Вокал», «Хореографий», «Актёр мастарлык», «Сылнымут шомак», «Декоративно-прикладной усталык» да «Изобразительный искусство» номинацийлаште вийыштым тергеныт.
«Вокал» номинацийыште 1-ше верым Красногорский психоневрологический интернат гыч К.Наенко ден С.Майоров сеҥен налыныт, 2-шо верым – Шоя-Кузнецово психоневрологический интернат гыч А.Чижовын, О.Михайлован, М.Виноградован да В.Шафровын ансамбльышт, 3-шо верым – Кокшайск инвалид интернат-пӧрт гыч Е.Моряков. «Хореографий» номинацийыште 1-ше вер дене «Таир» психоневрологический интернатын ансамбльже палемдалтын, 2-шо вер дене – «Сосновая роща» инвалид интернат-пӧрт гыч А.Кондаков да 3-шо вер дене – Кундыштӱр психоневрологический интернатын куштышо коллективше. «Сылнымут шомак» номинацийыште 1-ше верым Красный Стекловар психоневрологический интернат гыч В.Ястребцевлан пуымо, 2-шо верым – Кужэҥер посёлкысо шкет илалше-влакын специальный пӧртышт гыч Т.Ивановалан, 3-шо верым – Марий Турек посёлкысо шкет илалше-влакын специальный пӧртышт гыч В.Рассохинлан. «Актёр мастарлык» номинацийыште эн сайлан Карлыган инвалид пӧртыштӧ илыше-влакым шотлымо, 2-шо вер дене Роҥгысо шкет илалше еҥ-влакын специальный пӧртышт гыч М.Реутовым, 3-шо вер дене Кожласола психоневрологический интернатыште илыше-шамычым палемдыме.
Сеҥыше-шамычлан чапкагаз ден приз-влакым кучыктымо. Моло участникым диплом да кумылаҥдыше пӧлек дене палемдыме.
Фестивальыште 100 наре инвалид ден илалше еҥ мастарлыкшым ончыктен.
М.ИВАНОВА.
