Белоруссийын рӱдолаштыже Минскыште 19 гыч 22 март йотке XXXIII тӱнямбал книга ончер-ярмиҥга эртен. Тушко «Марий книга издательстве» савыктыш пӧртын лектышыж дене директор Эдуард Иманаев миен.
Тӱнямбал ончер-ярмиҥгаште 23 эл гыч – нунын коклаште Бразилий, Венесуэла, Вьетнам, Иран, Казахстан, Молдова, ОАЭ да моло элла гычат – 500 наре участник лийын. Нуно Минскысе «Белэкспо» ончер-рӱдерыште погыненыт. Российысе книга-влакым ончыкташ лӱмынак кугу стендым ыштыме, тушто Марий савыктышын лукмо книгаже-влакланат вер ойыралтын.
Ик кечынже директор Эдуард Иманаев погынышо-влаклан Беларусь ден Марий Эл коклаште шукертак ышталтше сылнымут усталык да гуманитар кыл нерген каласкален, Марий книга савыктыш нерген видео гоч палдарымаш лийын. Тыгак марла «Аист-влакын шӱдыран корнышт» сылнын сӧрастарыме йоча книга дене палдарыме. Тудым издательстве ӱмаште савыктен луктын. Тушко 12 белорус авторын йочалан марлаш кусарыме йомакышт пуреныт.
Фото йымак:
Эдуард Иманаев книган Минскысе тӱнямбал ярмиҥгаштыже. Фотом издательствын соцлаштыкше гыч налме.
Марий книга савыктышын материалже негызеш Геннадий Сабанцев ямдылен.
