КУЧЕМЫШТЕ

«Ковидым мучаш марте сеҥаш кÿлеш»

Тичмаш налмаште Марий Элыште эпидситуаций неле, но пеҥгыде семын аклалтеш.

Марий Элыште у коронавирус инфекцийым кондымым да шаркалымым чактарыме шотышто оперативный штабын черетан заседанийыштыже Роспотребнадзорын Марий Элысе виктемжым вуйлатыше Светлана Булатова COVID-19 дене черланыме чотын палынак иземмыже, туге гынат калыклан вакцинаций ден ревакцинацийым жапыштыже эрташ, кундемыштына маске режимым арален кодаш кÿлмö нерген ойлен. Мутшо почеш, пытартыш жапыште у коронавирус инфекцийым шижде чытыше-влакым январьысе деч ныл пачаш чÿчкыдын рашемдаш тÿҥалме, сандене калыкым тестироватлыме кугытым шинчымашым пуымо организаций, социальный тöнеж ден правам аралыше орган-влакын пашаеҥышт кÿшеш арален кодаш кÿлеш.

«Таче элыштына у коронавирус инфекций дене черланыме чот ÿмашсе тыгаяк пагыт деч кум пачаш кугу, пандемий тÿҥалме идалыкысе деч – вич пачаш. Тичмаш налмаште эпидситуаций неле семын аклалтеш. Оперштабын увертарымыж почеш, пытартыш суткаште стационарлашке 2,8 пачаш шуко черлым эмлалташ пыштыме. Тыгаяк сÿрет элнан 78 регионыштыжо палдырна. Тылеч посна колымо кугу чот огеш изем, а тÿшка иммунитет лушкен толеш. Таче тудо – 49,7 процентыште. Эпидемиологический йодмаш-влакым шукташ гын, республикыштына у коронавирус инфекций дене кылдалтше сÿретым саемдаш лиеш. Сандене кызытеш маске режимым арален кодаш йодам», – палемден С.Булатова.

Тазалык аралтыш министрын алмаштышыже Татьяна Бастракован мутшо почеш, Марий Элыште COVID-19 деч вакцинацийын планжым 79 процентлан шуктымо, Россий Федерацийыште – 75 процентлан. Кызыт вакцинын бустерный дозыжо-влакым колтымо план-графикым ыштыме. 136 тÿжемат 960 еҥлан прививкым эше ыштыкташ кÿлеш. Ревакцинацийым 85 тÿжемат 320 граждан эртен. Йоча-шамычлан «Спутник М» вакцинын 720 комплектшым кондымо. Прививкым 351 икшывылан ыштыме. Тазалык аралтыш министерстве калыклан у коронавирус инфекций деч вакцинаций ден ревакцинацийым умбакыже эрташ, тидын нерген увертарыме шот дене медицине пашаеҥ-шамычлан эсогыл граждан-влак деке мöҥгышкышт лектын кошташ темла. 

Марий Элым вуйлатыше нине темлымаш дене келшен да черланыме чотын иземмыжлан жап деч ончыч куанаш огеш лий, ковидым мучаш марте сеҥаш кÿлеш манын.

«Шарнеда, кум арня ончыч медицине маскым обязательно чияш кÿлмö нерген йодмашым кораҥдыме темым ончаш ямде улмем нерген ойлышым. Но мый тунамак тиде пунчалым Роспотребнадзорын шонымашыжым шотыш налын луктам маньым. Таче тудын позицийже – маске режимым кодаш. Мут толмашеш, тудым кораҥдыше-влак таче тиде йодмашым пöртылташ шонат», – палемден А.Евстифеев.

Марий Элым вуйлатыше кеҥежымсе тазаҥдыме кампаний, школьник ден студент-шамычын кеҥеж каникулышт вашеш эпидемиологий велым кӱлешан мере-влакым ончылгоч приниматлаш, ты шотыштак йоча-влак ден молодёжь, лагерь ден каныме тöнеж пашаеҥ-шамыч коклаште вакцинаций ден ревакцинацийын шырымыштым кугемдаш задачым шынден.

А.Евстифеев республикын муниципальный образованийже-влакым вуйлатыше-шамычлан кок арня жапыште озанлыкым кучышо субъект вуйлатыше-влак дене вашлияш да пашаеҥ-шамычлан ревакцинацийым эрташ кÿлмö нерген ушештараш кÿштен. Тыгак республикышкына ДНР да ЛНР гыч толшо граждан-влакым тестироватлыме да вакцинироватлыме темылан поснак кугу тÿткышым ойырен. 

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

 

Опубликовать в Одноклассники

Добавить комментарий