«Кумдыкым комплексно вияҥдымаш» программе кышкарыште
Йошкар-Оласе 6-шо микрорайонышто школым чоҥаш палемдыме.
Марий Элым вуйлатыше Юрий Зайцев Россий Федерацийыште регионым вияҥдыме шотышто правительстве комиссийын президиумжын (штабшын) заседанийыштыже лийын. Тудым вице-премьер Марат Хуснуллин видеоконференций йӧн дене эртарен.
Заседанийыште каҥашыме йодыш-влак кокла гыч иктыже 2025 ийыште «Илышлан инфраструктур» национальный проектым илышыш пуртымо кышкарыште объект-влакым финансироватлыме да нунылан контрактацийым ыштыме шотышто лийын. Тӱҥ шотышто мут «Илыме вер» федеральный проектым шыҥдарыме нерген тарванен. Марат Хуснуллинын палемдымыж почеш, единый увер системын данныйже дене келшышын, 1 февральлан элыштына шуко пачеран 11300 пӧрт чоҥалтеш. Тудо ешарен, «Илышлан инфраструктур» нацпроект шотышто кугыжаныш советын комиссийжын заседанийыштыже илыме верым чоҥымо рынкысе сӱретым, отрасльлан полышым пуымо да кызытсе экономике условийыште ипотеке йӧн дене кредит шотышто каҥашеныт.
Марий Элыште «Илыме вер» федеральный проект почеш тений январьыште 27 тӱжем наре квадратный метр кумдыкым чоҥымо да тушко еҥ-влакым илаш пуртымо. Тений идалык мучко 478 тӱжем квадратный метр кумдыкым чоҥаш палемдыме.
Республикым вуйлатыше Юрий Зайцевын мутшо почеш, шуко пачеран пӧрт-влакым чоҥымо дене пырля тушто инфраструктурым вияҥден толман. Илыме вер пелен образовательный тӧнеж, йоча да спорт площадке-шамыч лийшаш улыт.
Ӱмаште декабрьыште Марий Эл правительстве Россий Чоҥымаш министерстве дене кумдык-влакым комплексно вияҥдаш виктаралтше проектлам илышыш пурташ федеральный бюджет гыч субсидийым ойырымо дене кылдалтше ойпидышым ыштен. Федеральный бюджет кӱшеш тудын кугытшо – 1,4 миллиард наре теҥге, тышеч 2025 ийлан – 231,6 миллион теҥге, 2026 ийлан – 552 миллион тенге, 2027 ийлан – 609 миллион наре теҥге. Тиде финансирований полшымо денак Йошкар-Оласе 6-шо микрорайонышто кыдалаш школым чоҥаш палемдыме. Кызыт проект-смете документаций ямдылалтеш.
Марий Эл вуйлатышын пресс-службыжын уверже негызеш Галина Кожевникова ямдылен.
Денис Речкинын фотожо
