Шке жапыштыже комсомол радамыште лийше да тудын дене кылдалтше пашам шуктышо-влак кокла гыч шукынжо кызыт сулен налме канышыште улыт але тиде пагытыш лишемыт. Туге гынат нуно самырыкышт годым чолгалыкым ончыктен тунемыныт да кызытат яра жапыштым пайдалын эртараш тыршат.
Тиде амал денак эше 2015 ийыштак самырык-влакым куштымаште полшышо «Воспитанники комсомола – моё отечество» общероссийский мер организацийын марий региональный отделенийжым почыныт. Тудын председательже Сергей Шареевын ден алмаштышыже Римма Катаеван палдарымышт почеш, кызытсе жаплан республикысе кажне районышто ушемын филиалже-влак улыт да тачысе кечылан радамыштыже чылаже 500 наре еҥ шотлалтеш. Эртарыме пашашт тӱҥ шотышто юбилей дате-влак дене кылдалтеш. Мутлан, ВЛКСМ-лан да Марий комсомоллан 100 ий темме лӱмеш мероприятий-влак кумдан палемдалтыныт. Марий комсомоллан 100 ий темме лӱмеш пайремым эртарыме жапыште тидын лӱмеш Йошкар-Олаште «Патриот» комсомол чап аллейым почыныт. Тыгак республикысе ятыр районышто спортын тӱрлӧ видше дене турнир-влак эртаралтыт. Тушто комсомолын ветеранже-влак веле огыл таҥасат, самырык-влак ушнат. Олалаште да районлаште Совет Ушемын, Российын геройжо, комсомолец-влаклан почмо памятник-влакымат эрыктат да шотыш кондат. Тыгак субботникым, вашлиймаш-влакым, школлаште Мужество уроклам, эсогыл самырык-шамычлан келшыше квизымат эртарат. Мутлан, шукерте огыл Оршанкыште тусо педколледжыште тунемше ден комсомолын ветеранже-влаклан СССР-ын историйже дене кылдалтше квиз лийын. Могай филиалыште паша поснак сайын ворана, тушко тӱшкан погынен мият да опыт дене пайлалтыт. Тыгай конференций ден мероприятийлашке район администраций вуйлатыше ден алмаштышышт кумылын ушнат. Икманаш, кузе палемдышт нуно, комсомолец-влак илат гын, комсомол ила.
Кызыт нине филиаллаште отчет ден сайлымаш погынымаш-влак эртаралтыт. Кодшо кечылаште Йошкар-Оласе организацийыште тыгай мероприятий лие. Тудын вуйлатышыже Алексей Васенёв шуктымо пашаштым иктешлыш, мероприятийыштышт ойыртемалтше комсомолын ветеранже-влаклан дипломым кучыктыш. Пытартышлан республиканский отчет да сайлымаш конференцийыш делегат-влакым сайлышт. Тудо рӱдолаште 29 ноябрьыште лийшаш.
Любовь Камалетдинова
Снимкыште (шола гыч пурлашке): Сергей Шареев, Алексей Васенёв, Геннадий Мустаев.
Авторын фотожо
