15 сентябрьыште Йошкар-Олаште Сеҥымашын ХХХ идалыкше лӱмеш тӱвыра полатыште Сад-пакчазын да пакчасаскам ончен куштышын кечышт эртен.
Выставкыште Якимсола гыч уста сад-пакчазе-влак Воскресенскихмыт ешын презентацийже поснак ойыртемалтше лийын. Нуно пакчам ныл ий ончыч кучаш тӱҥалыныт. Теплицышкышт шукырак ошымшӱлыш чоҥештен мийыже манын, фацелийым ӱденыт. Вате-марий шошым росотам шындыме годым удобрений олмеш биогумусым (вермикомпостым) кучылтыт. Тудыжым йыл ышта.
Тиде шкешотан удобренийын кузе ышталтмыжым калыклан ончыкташ манын, Воскресенскихмыт йыллан келыштарыме изи фермым конденыт. Йылым органике отход дене пукшат. Вес семын ойлаш гын, кешырын, шоганын, пареҥгын, моло пакчасаскан, фруктын шӱмыштым пакчазе-влак компост лакыш пыштат, шӱктат. Поснак старатель йыл урлык пеш пайдале. Тудо биогумусым шукырак луктеш, йӱштӧ деч ок лӱд. Ты урлык шем кокос субстратыште ила. Воскресенскихмыт тыгак арбузым, грушым, дыньым, помидорым, фасольым, шоганым, чеснокым, кавуным ончен куштат.
Выставке-ярмиҥгаште сад-пакчазе Людмила Лосева дене палыме лийынна. Тудо кызыт киярым ончен кушта, тений Курск кундем гыч пареҥгым конден да пакчашкыже шошым шынден. Кечывалвел гыч кондымо пакчасаскажын лектышыжым ончерыште ужаш лийын.
У Торъял район гыч Наталья Курочкинан ямдылыме презентацийжат ойыртемалтше ыле. Тудо 12 урлык пареҥгым ончен кушта, тылеч посна тӱрлӧ розам шында. Ты сӧрал кушкылжо ӱдырамашын кудывечыштыжат, пӧртыштыжат шинчам куандарен пеледеш. Наталья кумылан-влаклан пеледыш гыч композицийым ыштыме мастер-классым ончыктен. Выставке-конкурсыш озавате япон селекций почеш ончымо роза пеледышым, пурысым, баклажаным, помидорым, антоновко урлык олмам конден. Н.Курочкина да тудын родо-тукымжо Российын икмыняр кундемыштыже тӱрлӧ кушкылым ончен куштат. Ик пакчаже У Торъялыште, весыже Москва областьыште, кумшыжо Азов теҥызын кечывалвел могырыштыжо верланеныт. Кечывалвелныже виноградым, фруктым шындат. Натальян ачаже Игорь Александрович урлыкаш виноградым кушта. Погынышо-влаклан, жюрилан Наталья Курочкинан презентацийже келшен, садлан тудо «Фазендын миссше» номинацийыште сеҥыше лийын.
Йошкар-Олаште илыше Валерий Пименов «Мистер-Огород-2024» номинацийыште сеҥышыш лектын. Пӧръеҥ тыгак СВО-што улшо салтак-шамычлан сортам ышта. Ты пашаш йоча-влакат кумылын ушнат. Тидын нерген тудо выставкыш мийыше-влаклан каласкалыш.
Тенийысе мероприятийыште кумылан-влак «Экомодо», «Пӱртӱс материал гыч ыштыме кидпаша», «Удачный кадр» да моло конкурсыштат усталыкыштым ончыктен кертыныт. Шукынжо, поснак йоча-шамыч, «Экомодо» конкурсыш ушненыт.
Михаил СКОБЕЛЕВ,
Лидия ШАБДАРОВА
М.Скобелевын фотожо
