Тений 12-21 июльышто Марий Элыште инвалид-влакын III всероссийский кеҥеж спартакиадышт лиеш. Кызыт ты кугу мероприятийлан чулымын ямдылалтыт.
Лач тидын шотыштак Марий Эл вуйлатыше молодёжный политике, спорт да туризм министр Л.Батюкова дене вашлийын. Тушто нуно регионыштына ты кугу событийлан ямдылалтме нерген кутыреныт.
Спартакиаде могай спорт объектыште лийшаш гын, чылажымат Марий Эл вуйлатыше кодшо ий ноябрьыште ончен лектын.
Ты ганат тиде йодышым тарватеныт. Спортсмен-влаклан чыла шотыштат йӧнан лийже манын, А.Евстифеев ончычак палемдыме экшыкым тӧрлымӧ кузе кайымым, у оборудованийым, инвентарьым налме йодышым рашемден.
Молодёжный политике, спорт да туриз министр таче кечылан ыштен шуктымо паша да лишыл жапыште мом да кунам ыштышаш нерген кумданрак каласкален.
Спартакиаде эртарыме верыш спортсмен-шамычым кондымо йодыш тӱҥ семын лийын. Республик вуйлатыше нунылан лӱмын келыштарыме мыняр автобус кӱлеш манын йодын. Л.Батюкован палемдымыж почеш, чылаже 80 автобус кӱлеш.
– Сай, пашам умбакыже ыштена. Республикыште спортсмен-влак лу кече лийыт. Культур программат ӧрдыжеш кодшаш огыл, – палемден А.Евстифеев. – Кажне спортсмен, электрон йӧн дене але тыглай брошюрым почын, республикыште эртыше мероприятийла гыч шканже ойырен налын кертшаш.
Таче кечылан спартакиадыш ушнаш элнан 40 субъектше гыч йодмашым пуэныт. Чылаже 1892 еҥ лийшаш. Нунын кокла гыч 1446 спортсмен гын, тушеч 94 участник – инвалид-колясочник.
Е.Эшкинина.
