1Май — тыныс илыш да паша пайрем! Тений Йошкар-Олаште тудым тӱрлӧ партий тӱрлӧ семын палемден. Мутлан, Коммунист, ЛДПР, «Справедливый Россий» партий-влак профсоюз демонстрацийыш ушненыт гын, «Единый Россий» тидын деч посна эше Сеҥымаш паркыште оласе калыкым пикникыш чумырен.
Тыгай пайремже але марте эртаралтын огыл ыле. Май кечыжат кумылым нӧлтен, кече шыратен ончен. Сценыште ончыч Ленин лӱмеш тӱвыра полатын творческий коллективше, мурызыжо-влак мастарлыкыштым ончыктеныт, а сцене шеҥгелне тӱрлӧ модыш ден конкрусым эртареныт.
Тидын деч вара «шашлык марафон» тӱҥалын. Организатор-влак тушко оласе 12 пашаче коллективын командыжым ушеныт. Нунын коклаште Марий машиностроитель завод, Марий кугыжаныш униерситет, Юл кундем технологический университет, «Акашевский» сурткайык фабрике, «Йола» шыл комбинат да молат лийыныт. Ончыч команде-влак куштымаш марафонышто участвоватленыт гын, вара оласе ик эн сай повар деч шашлыклан шылым ямдылыме шотышто мастер-классыште лийыныт. А вара кажне команде шашлыкым кӱктен. Ямде чесым пайремыш толшо-влак авызлен да аклен кертыныт. Тышеч-тушеч парк мучко шашлык пуш шарлен.
Паркыште ты кечын пеш весела лийын. Тӱрлӧ ийготан да профессиян еҥ-влак чумыргеныт. Эшежым тӱрлӧ паша коллектив-влак коклаше кылым ышташ йӧн лийын. Ты мероприятий чынжымак оласе калыкын тӱшкан каныме ик эн сай йӧнышкыжӧ савырнен. Сандене тудо поро йӱлаш пура манын ӱшаныме шуэш. А такшым, майын икымше кечынже Йошкар-Олаште тӱрлӧ мероприятий эртаралтын. Профсоюз лидер Ольга Цветкован палемдымыж почеш, тений демонстрацийыш 10 тӱжем лишке еҥ ушнен. Тудо «За справедливую экономику в интересах человека труда» девиз дене эртен.
C. НОСОВА
Снимкыште: оласе пикник годым.
Авторын фотожо.
