Россий кугыжаныш йоча библиотеке тӱрлӧ калыкын йомак сборникшым темла. Икшывыда-влак дене пырля лудса!
Псков кундемысе йомаклаште Ӱшкыж презе, Маскаиге, Лутонька персонаж-влак вашлиялтыт. Мучаште диалект да шуэн вашлиялтше тошто мут-влакым умылтарымашым пуымо.
Камчаткыште да Курил отролаште илыше ительмен калыкын (тӱп калык) фольклорыштышт вашлиялтше Кутха лӱман чоя шемгорак нерген йомак-влакым лудаш темлат.
Байкал кундем да тудын калыкше нерген каласкалыше легенде-влакым «Байкал ерын йомакше-влак», Якутийыште илыше калык-влакын йомакыштым «Сказки Якутской тайги и тундры» книгалашке чумырымо.
«Уральские сказы» книгаште писатель Павел Бажовын «Серебряное копытце», «Голубая змейка» йомакше-влак савыкталтыныт. Урал курыкын фольклоржо дене палыме лийына.
«Сказки народов Дагестана» книгасе йомак-влак поро да осал, пиал, илыш чын нерген шонкалаш таратат.
«Сказки сибирских деревень» сборникыш пурышо сказ-влакым автор-составитель шке коваже Елена Владимировна деч йодыштын. Ойлымашлаште Мӱй пондаш, Почереда, Шӧртньӧ кува, Моряна да молат вашлиялтыт.
Алтай кундем, тудын историйже, пӱртӱсшӧ, легендыже-влак нерген каласкалыше «Алтайские сказки» книгашке «Ячменное зерно», «Сто умов», «Жадный глухарь», «Жена павлина» да моло йомак-влак савыкталтыныт.
«Марийские сказки» книгаш пуртымо йомаклаште осал юзо вий ваштареш кучедалше марий патыр-шамычын лӱддымылыкышт да чапышт нерген ойлалтеш.
Л.СЕМЕНОВА
Фотом Марий Элын тӱвыра, печать да калык-влакын пашашт шотышто министерствын сайтше гыч налме
