Марий Элын Пӱртӱс поянлык, экологий да йырым-йырысе средам аралыме министерствыштыже кундемыштына африкан чума шарлыме деч аралалтме шотышто кугу совещаний эртен.
Министерствын спецалистше-влак деч посна тушто пӱртӱсым аралыме марий межрайонный прокурор А.Киселев, Угарман областьыште да Марий Элыште Россельхознадзор управлений вуйлатышын полышкалышыже В.Сидоров, Оршанке, Звенигово, Советский районласе администрацийлан, «Звениговский» ООО-н, «Шойбулакский» АО-н еҥже-влак лийыныт.
Африкан чуман мемнан республикыш толын кертме лӱдыкшыжӧ уке огыл, молан манаш гын тений гына августышто ты чер дене черланыме случай угыч Угарман кундем Шараҥге велне лийын. А тудо Килемар ден Юрино районласе чек деч тораште огыл верланен. Сандене мемнан республикыштат министерствын специалистше-влак ирсӧсналан мониторингым, нунын чотыштым иземдаш виктаралтше мероприятий-влакым эртараш тӱҥалыт. Сӧснам ончышо «Звениговский», «Шойбулакский» озанлыклаштат комплекс-влак воктене 20 километрыште аралыме зоно-влакым ыштат. Сонарзе-шамыч ты кумдыкышто ирсӧснам пий деч посна чыла моло йӧн дене сонарлен кертыт. Тиде амал денак ир янлыкым пукшымо площадке, тыгак пасу-шамычымат комплексла деч 20 километр ӧрдыжкӧ кораҥдат.
С.Носова.
