«Единый Россий» партийын «Йӧным пуышо тӱня» («Мир возможностей») проектше «Артек» тӱнямбал йоча рӱдерыш каяш путёвкым модын налаш йӧным ышта.
Проект дене мемнан республикыште тудын кураторжо, «Единый Россий» партийын еҥже, Марий Эл образований да науко министр Лариса Ревуцкая Йошкар-Оласе 32-шо №-ан школышто эртыше «Шуко калыкан Марий Эл» республик кӱкшытан форум-фестивальыште палдарен.
«Йӧным пуышо тӱня» проект – йоча-влаклан цифран кумдык. Тушко ушнаш интернет полшымо дене регистрироватлалтман да палемдыме направлений гыч келшышым ойырыман, вара заданий-шамычым шуктыман. Тидым йоча ешыж дене пырля ыштен кертеш.
Заданий-шамычым шуктымеке, отчёт-презентацийым ямдылыман. Ончыч тудым республикыште аклат, вара – федеральный кӱкшытыштӧ. Эн сай пашан авторжо-влаклан награде – «Артек» тӱнямбал рӱдерыш путёвко.
Тений гыч проектыш кыдалаш профессионал образованийым пуымо тӧнежлаште тунемше-влакат ушнен кертыт.
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
