Кугыжаныш Погын председательын алмаштышыже Александр Майоров Россий кӱкшытан икымше аграрный диктантыште лийын.
Мероприятий Россий Ялозанлык министерствын полшымыж дене «Российысе села» федерал партийный проект кышкарыште чыла регионышто эртаралтеш. Тудын тӱҥ шонымашыже – ял илышым, аграрный профессийым кумдан палдараш. Ончыкыжым ий еда эртаралташ тӱҥалеш.
Агродиктантым эртарыме тӱҥ верлан Агробизнес кадрым уэш ямдылыше марий институтым ойырен налме. Республикнан законодательный органже лӱм дене погынышо-влакым тиде событий дене Александр Майоров саламлен.
«Элнан кочкыш продукт шотышто лӱдыкшыдымылыкшӧ кугыжанышын ик эн ончыч шуктышаш задачыже семын лийын да лийын кодеш. Кызыт тыгай мут-влак поснак кӱлешан улыт. Ӱшанем, Марий Эл, аграрный кундем семын, ончыкыжымат элналан сай качестван кочкышым ситарымашке шке ужашыжым ӱшанлын ушаш тӱҥалеш», – палемден парламентарий. Тудо шкежат тестын йодышыжо-влаклан вашештен.
Кумылан кажне еҥ 12 октябрь марте онлайн йӧн дене ялозанлык нерген шинчымашыжым терген кертеш. 45 минут жапыште Российын ялозанлыкшын историйже, мланде паша, вольык озанлык, кушкылым ончен куштымо дене кылдалтше 30 йодышлан вашештен шуктыман.
Вячеслав Смоленцевын фотожо.
