Конкурс
Коктын сеҥышыш лектыныт
«Россий ЭРА» ассоциаций да Россий Электропрофсоюз «Электроэнергетикыште пашам аралыме сферысе эн сай специалист/вуйлатыше» конкурсым иктешленыт.
«Рӱдӧ да Юл кундем Россеть» ПАО-н «Мариэнерго» филиалжын кок пашаеҥже сеҥышыш лектын: «Электроэнергетике организацийлаште пашам аралыме подразделенийын эн сай вуйлатышыже» номинацийыште – Денис Степанов, «Электроэнергетикыште пашам аралыме шотышто эн сай специалист» номинацийыште – Александр Курдюмов.
Сеҥыше ден призёр-влакым Москвасе Тӱнямбал сатулымаш рӱдерыште наградитлыме. Тушто Российысе 30 утла электроэнергетике предприятий гыч 54 пашаеҥ лийын. Конкурс энергокомпаний-влакын пашам аралыме службыштын еҥыштлан пашаште лӱдыкшыдымӧ условийым ыштыме да производствышто сусыргымо деч шижтарен шогымо шотышто опыт да эн сай практике дене палдараш йӧным пуэн.
Таҥасымаш ныл йыжыҥ дене эртен: икте – дистанционно, кумыт – очно. Икымшыште пашам аралыме шотышто нормативный право актлам палымым тергыме. Моло йыжыҥыште тематике почеш икмыняр йодышым тарватыме: производствышто азап лийын кайыме годым икымше полышым пуымаш, азап лийме амалым тергымаш, шкем аралыме средствым кучылт моштымаш.
Юрий ИСАКОВ.
Снимкыште: Александр Курдюмов ден Денис Степанов.
Фотом «Мариэнергон» пресс-службыж деч налме.
