Йошкар-Олаштына закондымын торым кышкыме верым ужаш лиеш. Тидын шотыштак рашемдынем, тидын нерген кушко йыҥгыртен, вуйым шийман?
А.Семёнова
Йодышлан Марий Элын Чоҥымо паша, архитектур да илыме-коммунальный озанлык министерствыштыже вашмутым пуэныт:
– Закондымын шӱкшакым кышкыме верым але контейнер площадкыште шуко тор погынымым шекланенда гын, тидын нерген мемнан министерствын да «Благоустройство» ООО-н «Шокшо линийышкышт» йыҥгырташ лиеш. Телефон номерышт тыгай: 8 (8362) 56-62-43, 8 (8362) 31-24-24.
Весымат шотыш налаш темлалтеш:
1. Контейнерыш быт шӱкшакым гына луктын кышкыман, тидын годым пластикым – посна шогышо контейнерыш (тыгайжым вераҥдыме гын).
2. Мебельым, быт техникым але моло вес кугу габаритан торым посна площадкыш але контейнер-влак воктеке вераҥдыман. «Благоустройство» ООО — регионысо оператор арнялан ик гана чыла поген наҥгая. Графикшым регионысо оператор але управляющий компаний деч рашемдаш лиеш.
3. Шаланыше кермычым, бетоным, пырдыжым шалатыме деч лекше, чоҥымо пашаште лекше, тыгак солымо тӱрлӧ кушкыл торым шке гыч шупшыктыман. Лиеш эше тыгай торым шупшыкташ разрешенийым налше организаций дене ты шотышто мутланен келшаш.
С.Носова ямдылен.
