Лӱмгече
Эр кече тушечла лектеш
Марий Турек район 100 ий теммым палемдыш
Марий Турек район республикыштына эн эр помыжалтеш манын таклан огыл ойлат, вет тушечла кече лектеш. Сандене ты тора кундемыш ончычсылак эр тарванышна. Миен шумылан район администраций ончылно 100 ияш лӱмгечыш погынышо калыкым Сардаял гыч самодеятельный артист-влак мурен-чӱчкен вашлийыт ыле. А районын чапланыше еҥже-влакым воктенак верысе райгазетын вераҥдыме «Икымше полосан геройжо» фотоончыш вучен. Меат тушто кодшо курымысо ик эн неле 90-ше ийлаште «Октябрьский» колхозым вуйлатыме пашам шке ӱмбакыже налше да кугу политикыште шке кышажым кодышо чолга ӱдырамаш Валентина Скулкинам войзен налын шуктышна.
Кундемым тӱрлӧ жапыште чапландарыше тыгай еҥже районын историйыштыже икте веле огыл лийын. Администрацийын образований пӧлкажын залыштыже торжественный погынымаш тӱҥалме деч ончыч «Марий Турек: эртыше да кызытсе» экспозицийым ончалмат тидымак пеҥгыдемдыш. Тудым В.П.Мосолов лӱмеш краеведений тоштер ямдылен. Тушто марий кокла гыч лекше икымше кугу учёный Василий Мосолов, ты кундемыште шочшо руш да совет живописец-график Михаил Платунов нерген оҥай уверым пален налаш йӧн ыле. Марий Турек районын шуко шочшыжо, 11 еҥ, Кугу Отечественный сарыште Совет Ушемын Геройжо лийын, нунын кокла гыч эн самырыкше – Сергей Суворов. СВО-штат лачак ты кундем гыч Сергей Иштуганов республикыштына эн ончыч Российын Геройжо лӱмым налын. Экспозиций дене тоштерын шанче пашаеҥже Светлана Назимова палдарыш.
Марий Элын вуйлатышыже Юрий Зайцев ты зданийыш пурымо деч ончычак администраций площадьыште «Марий Турек районын историйже» стендым ончен савырныш, а фойеште «Тӱрлӧ калык – ик еш» фотоконкурсышто сеҥыше-влакын паша выставкышт дене палыме лие. Сандене торжественный погынымаш тӱҥалмекат, ты кумыл денак теве мом палемдаш кӱлешлан шотлыш: районын тӱҥ поянлыкше тушто илыше, нелылыкым сеҥен толшо да ончыко ӱшанлын ончышо еҥ-влак улыт.
«Марий Турек районышто агропромышленный комплекс тыршен пашам ышта, изи да кокла кугытан бизнес вияҥеш, социальный задаче писын решатлалтеш. Кундем этнотӱвыра могырым тӱрлӧ улмыж дене ойыртемалтеш. Тыште марий, руш, татар да удмурт-влак келшен да ваш умылен илат. Кажне калыкын шке йылмыжым, тӱвыражым да йӱлажым аралаш йӧнжӧ уло», – кугешныме кумылын каласыш Юрий Зайцев.
Республик вуйлатыше районышто илыше-влаклан шочмо кундемым йӧратымыштлан да пашам тыршен ыштымыштлан тауштыш да наградым кучыктыш. «Колос» агрофирме» ООО-н директоржо Марсель Мухаметов «Марий Эл ялозанлыкын сулло пашаеҥже» почётан лӱм дене палемдалте. Икмыняр еҥ Марий Эл правительствын Почётан грамотыжым нале.
Марий Турек калыкым тыгак Россий парламентын Федераций Советшын Обороно да лӱдыкшыдымылык комитетшын председательжын икымше алмаштышыже Сергей Мартынов саламлыш. Район эреак ялозанлык производствыж дене ойыртемалтын, мане тудо да у кӱкшытыш шуаш тыланыш.
А тиде яра мут огыл: кодшо курымысо 80-ше ийлаште район идалык еда 100 тӱжем тонн наре пырчан да отызан культурым шийын налын, республикыштына киндым эн шуко шочыктышылан шотлалтын. Тылеч вара ялозанлык куштылго огыл пагытым илен лектын, но кызытат тиде лӱмжым арален коден. Ынде озанлык-влак шӧр лӱштышлан тӱткышым утларак ойыраш тӱҥалыныт да кугу лектышыш шуын толыт. Теве «Акпарс» агрофирме» ООО тений кажне ушкал деч 10 тӱжем килограмм шӧрым налмашке шуаш шона. Тидын нерген район администраций вуйлатыше Сергей Решетов экономикын ошкылжым иктешлымаштыже палемдыш.
Ты кечын районын экономике да социальный илышышкыже надырым пыштыше шагал огыл еҥлан наградым, тидын шотыштак районлан 100 ий темме лӱмеш медальым, кучыктышт. Нуным верысе да ола гыч толшо усталык коллектив-влак шке мастарлыкышт дене куандарышт.
Юрий ИСАКОВ
Снимкылаште: ончылно – С.Мартынов, Ю.Зайцев, С.Решетов; Сардаял гыч усталык коллектив; С.Назимова тоштерын экспозицийже дене палдара; ялозанлык пашан ветеранже В.Скулкина; фотоконкурсышто сеҥыше-влакын пашашт дене палыме лиймаш; Марий Турек районын чапланыше еҥже-влак дене палдарыше стенд воктене.
Авторын да Д.Речкинын фотошт
