Амал деч посна огыл Чыкма олаште Ильф ден Петровын «12 стульев» произведенийышт гыч геройжо Остап Бендерлан пӧлеклалтше эсогыл посна тоштерым шке жапыштыже почыныт.
Кажне ийын гаяк Юлын пурла серысе марий олаште ты литератур персонажлан пӧлеклалтше мыскара да койдарчык фестиваль эсогыл 1995 ий гычак эртаралтеш. Произведенийыште лачшымак Чыкма ола нерген ойлалтеш маныт.
Тоштер, пайрем, а ынде Козьмодемьянскысе драме театрын артистше-влак нине авторынак произведенийышт почеш «12 стульев» лӱман постановкымат ямдыленыт. Олан 440 ияш лӱмгечыжлан пӧлекым ыштеныт. Пайремжым 26 августышто палемдаш тӱҥалыт.
Пытартыш кок ийыште пандемийлан кӧра Бендериаде лийын огыл, сандене тенийсыжым тушто чотак вученыт. Йӱла почеш Чыкма ола ик кечылан лачшымак Остап Бендерын да тудын йолташыже-влакын кидышкышт кусна. «Парад дене мый командоватлаш тӱҥалам», – манеш произведенийыште тудо. Пристаньыште Бендерым вашлийыт, вара чылан олан рӱдышкыжӧ йолын каят. Шествийыш ушнышо кажне делегаций тидын годым шкенжым ончыктышаш, а вара ойыртемалтше-влакым посна номинацийлаште палемдат. Теният тыгак лийын. Мутлан, Козьмодемьянскысе Добровольчестве рӱдерын ӱдыр-рвезыже-влак «Йоча – илышын пеледышыже» номинацийыште ойыртемалтыныт.
Шествийышке эсогыл Марий Элын Киокусинкай да шуко стилян карате федерацийын Козьмодемьянскысе филиалжат ушнен. Туге нуно моторын ошкыл эртеныт, возалтеш пайремын соцкыл лаштыкыштыже.
Фестивальым торжественно почмаште Остап Бендерлан эсогыл ола деч символический сравочымат кажне гана кучыктат. А вара чылажат тӱҥалеш… Молгунамсе семынак пайремыш толшо-шамычым шахмат турнир, костюмированный куржталмаш, тӱрлӧ мастар-класс, конкурс вученыт. Эсогыл таракан-влакым куржталыктеныт!
12 пӱкеным ужалыме аукционышто тений бриллиантым Йошкар-Ола гыч мийыше самырык мужыр модын налын. Мо оҥайже, пиал шыргыжалже манын, нунын эсогыл кок пӱкеным аукционышто налыныт. Москва гыч фестивальыш лӱмын толшо вес мужырат кок пӱкеным налын, но нунылан бриллиант садак логалын огыл.
Йошкар-Ола гыч мыскара театрын, Нижний Новгород гыч кавер-группын концертышт, шоу программе, дискотеке эртеныт. Ты кечын паромат Юл эҥер гоч эсогыл пелйӱд марте коштын.
С.Носова
Фотом Бендерадылан пӧлеклалтше соцкыл лаштык гыч налме.
