Марий Эл вуйлатыше Александр Евстифеевын темлымыж почеш, 27 майыште Йошкар-Олаште Марий Эл Кугыжаныш Погынын шымше созывшын латкандашымше сессийже эртен, тудым погын председатель Анатолий Смирнов вӱден. Повесткышкыже палемдыме икымше йодыш почеш, депутат-влак «Марий Элын Конституцийышкыже тӧрлатымашым пуртымо нерген» законын проектшым кокымшо гана лудмаште каҥашеныт да пеҥгыдемденыт.
«2021 ийлан да 2022 ден 2023 плановый ийлан Марий Эл Республикын республиканский бюджетше нерген» Марий Элын законышкыжо вашталтышым пуртымо нерген» йодышым каҥашыме годым депутат-влак республикын тӱҥ финанс документышкыже вашталтышым пуртымо верч йӱкленыт Тыге, 2021 ийыште казнан доход ужашыже 2312,4 миллион теҥгелан кугемеш, роскот ужаш 3123, 8 миллион теҥгеш шуэш, тышеч 916,1 миллион теҥге дефицит лектеш. Нефтепродуктлан акциз да федеральный казна гыч пурышо окса кӱшеш Марий Элын 2022 ийысе бюджетысе доход 1956,9 миллион, 2023 ийлан 1444,3 миллион теҥгелан кугемеш.
Л.СЕМЕНОВА
