9 мартыште Марий Элым вуйлатыше Александр Евстифеев мер пашаеҥ-шамыч дене вашлиймаште у коронавирус инфекций дене кылдалтше чарак-влак шотышто кок документыш кидпалыжым пыштен.
Указын у редакцийже дене келшышын, утларак ямде улмо режим 4 апрель мартеак кодеш, тыгодым нине чаракат вийыште лийыт:
- публичный, ончыктымо, кандарыме, куандарыме, сотемдарыме, ончер, рекламе да тыгай шотан моло мероприятийым калык дене пырля (очно) эртараш огеш лий;
- граждан-шамыч зданийыште, сооруженийыште, оралтыште, 500 еҥ деч шуко улман верыште, тӱшка транспортышто, кӱртньыгорно транспорт инфраструктурын объектыштыже, легковой таксиште, пассажир-влакым да багажым заказ почеш шупшыктышо транспорт средствыште маскым але респираторым чийышаш улыт.
А нине чарак кораҥдалтыт:
- социальный дистанцийым эскерыме шотышто йодмаш;
- граждан-влакым посна организацийлашке у коронавирус инфекций деч прививкым ыштыктыме але тиде черым чытен лекме нерген QR-код, сай ПЦР-тест але вакцинаций деч медицине велым кораҥдалтме нерген справке дене гына пуртымо шотышто йодмашым;
- физкультур да спорт мероприятийлашке зритель-влакым угыч пурташ тӱҥалаш йӧным ыштыме;
- мужыраҥмым торжественно регистрироватлыме годым граждан состояний акт-влакым возымо орган-влакын пашаштым ончычсо радамышкышт пӧртылтымӧ;
- тӱвыра да каныме парклаште, тыгак шке семын организоватлыме площадкылаште аттракцион-влакын пашаштым угыч тӱҥалаш лиеш;
- йоча модмо пӧлем, йочам веселаҥдыме рӱдер (комплекс), йоча каныме моло заведений ончычсо паша радамышкышт пӧртылын кертыт;
- ийготыш шудымо-шамычлан (18 ияш марте ийготан йоча-влаклан) сатулымо, сатулымо да веселаҥдыме рӱдерлаште (комплекслаште) ача-ава але закон дене пеҥгыдемдыме еҥ деч посна кошташ йӧным ыштыме;
- пашам ыштыдыме 60 ияш да тылеч кугурак ийготан, тыгак хронический черан еҥ-влак обязательный самоизоляций режим гыч лектын кертыт;
- гражданско-правовой ойпидыш почеш пашам ыштыше-влакым дистанционный паша режимыш кусарыме нерген темлымашым шӧрымӧ.
У пунчал дене келшышын, кинотеатрлашке, тӱвыра ден спорт объектлашке калыкым палемдыме деч шуко пуртымо шотышто чаракым кораҥдыме.
Марий Эл Республикын организаций да аналитике виктемжын уверже негызеш М.ИВАНОВА ямдылен
