11 февральыште Михаил Васютин ден Николай Сорокин Марий Элын Кугыжаныш Погынжо ден Сарын, пашан, Вооружённый Вийын, правам аралыше орган-влакын ветераныштын (пенсионерыштын) всероссийский мер организацийыштын Марий республикысе организацийже коклаште пашам пырля ыштыме нерген келшыкыш кидпалыштым пыштеныт.
1987 ий 27 мартыште ыштыме тиде ветеран организаций таче шке йырже Марий Элыште илыше 34 тӱжем утла ветераным (пенсионерым) чумырен.
Михаил Васютин организацийын республикнам да элнам вияҥдымашке пыштыме надыржым кӱкшын аклен.
«Тиде келшык чылаланнат кӱлеш. Тудо ветеран-влакын илышыштым саемдымашке виктаралтше пашам пырля ыштыме йыжыҥын тӱҥалмыж нерген ойла. Ме законодательствын ветеран-шамычлан полшымо, нунын правашт ден интересыштым шуктымо да пӧртылтымӧ ужашыжым саемдыме йодышым пырля каҥашаш палемденна», – манын депутат корпусым вуйлатыше.
Николай Сорокин шкеж велым самырык тукымым шочмо элым йӧратыме шӱлышеш куштымо, историйын чынжым арален кодымо да Шочмо элна ончылно заслугышт дене чапланыше землякна-шамыч нерген шарнымашым курымлан кодымо йодыш-влак шотышто пашам пырля ышташ кӱлмӧ нерген ойлен.
Маргарита ИВАНОВА
Марий Эл Кугыжаныш Погынын пресс-службыжын фотожо
