Ий гыч ийыш – у деч у
Кажне ийын Пеледыш пайремыш «Марий Эл» газетнан уло коллективше дене рӱж ушнена.
Ме погынышо уло калык дене пырля таҥошкылмаште эртена, а вара кажне журналист пайрем кузе кайымым ончен савырна да репортажым ямдыла, еҥ-влак дене мутлана, интервьюм воза, моло материалым ышта.
Тидын дене пырля ынде икмыняр ий почела кудо-влак коклашке меат шатернам вераҥдена да шке йырна еҥ-влакым чумырена: газетна нерген каласкалена, савыктен лукмо книга-влакым темлена. Ик ийын эсогыл республикысе район-влак коклаште эртаралтше конкурсышто посна диплом дене палемдалтынна ыле!
Озавате-влакым чумыренна
А тений йӧршеш уым шонен муынна. «Сурт-пече» газетнан «Озавате» лаштыкыштыже кочкыш конкурсым увертаренна ыле. Кум тылзе утла жапыште кажне номерыштыже гаяк тиде я тудо озаватын сий рецептшым савыктенна. Тыге чылаже 10 участнице, нунын кокла гыч ик вате-марий, лийын. (Мут толмашеш ойлаш гын, кок участнице тӱрлӧ амаллан кӧра иктешлыше мероприятийышкына толын кертын огыл).
Вараже, йӧн дене пайдаланен, чылаштымат Пеледыш пайрем кечын «Марий Эл» увер агентствын площадкышкыже ӱжынна. Озавате-влакым вигак мокталтенак кодымо шуэш. Кажныже могай молодец! Вет тылеч ончычсо кастене, товатат, иктыжат ласкан мален огыл: конкурсым иктешлымашке наҥгаяш сийым ямдылен, калык ончылно мом кузе ойлышаш нерген тургыжланен, шонкален…
Такмакым йоҥгалтарышт, почеламутым шергылтарышт!
Кызыт каласен кертына: нуно арам ойгыреныт. Молан манаш гын кажныже, кузе тыгай годым ойлат, шындыме задачым шот дене да кӱлеш семын шуктен. Адакшым шукынжо презентацийыштым шкешотан усталыкыштым кучылтын эртарышт. Тыште эн ончычак Параньга район Яҥгетсола ял гыч озавате-влак нерген ойлыман. Ик амалже – нуно марий палышым кумытын кӱэштыныт! Молан тыге лийын? Республик кӱкшытан Кугечым эртарымашке ты ял гыч Роза Ивановна Данилова ыштен кондышаш улмаш. Но туге лектын, палышым вараже тудын рецептше почеш Раисия Окунева ден Надежда Иванова ямдыленыт. Санденак конкурсышкынат кумытынак ыштен конденыт.
Нунын нерген посна палемден ойлымын вес амалже – озавате-влак мом кузе ямдылымышт нерген ышт каласкале, а лӱмын конкурслан возымо такмаклаште мурен палдарышт! Вет нине ӱдырамаш-шамыч чыланат шке ялысе тӱвыра пӧртышт пелен чумырымо «Ший шымаш» фольклор ансамбльын участницыже улыт. Тидым шотыш налынак, ты тӱвыра пӧрт ден тиде ансамбль вуйлатыше Эльвира Захарова ден учрежденийын аккомпаниаторжо Михаил Захаров презентацийыштым эртараш полшышт. Сылне гармонь сем почеш такмак-влакым чылан пырля туге шергылтарышт – Марий паркыште улшо еҥ-влакат шукынжо нуным ончаш да мурымыштым колышташ мемнан деке лишемыч! Теве кузе кертыч!
Тылеч вара моло участницат: Кужэҥер район Марий Шой ял гыч Галина Фёдоровна Золотарёва, ты район гычак Йӱледӱр тӱвыра пӧрт вуйлатыше Людмила Александровна Романова, У Торъял район Кузнеч тӱвыра пӧрт вуйлатыше Эльвира Дмитриевна Яметова сийыштым кузе ямдылымышт нерген каласкалымышт деч ончыч ик-кок такмакым йоҥгалтарышт. Кужэҥер район Кугу Лаждӱр тӱвыра пӧртын хормейстерже Зоя Максимовна Соколова гына, очыни, презентацийым икымше эртарышат, тидым ышташ ӧрмалгыш да рецептшым каласкалышак веле. Звенигово район Кукшэҥер тӱвыра пӧрт вуйлатыше Марина Васильевна Кулакова гын, ала сайын мурен ом мошто шонен, векат, но содыки келшен толшо ик такмакым почеламут семын ойлен кодыш.
У Торъял район Токтарсола ял гыч Небогатиковмыт ешымат поснак палемдыман. Земфира Васильевна ден Евгений Викторович коктын куэвӱдым шолтен конденыт. А озавате конкурсыш шӱрашан мелнаж дене ушнен. Нуным кузе ямдылыме нерген суртоза эсогыл почеламутым возен да коктын лудын пуышт. Евгений Викторовичше гын туге кугу йӱкын шергылтарыш – конкурснам мучашлаш моткоч лачеш келшен тольо!
Кажныже аклен кертын
Участнице-влак кочкышыштым кузе ямдылымышт нерген палдарымышт дене гына ышт серлаге, кажне озавате шке сийжым вигак мыланна, ты жапыште площадкыште лийше газет пашаеҥ-влаклан, да ончаш погынышо еҥ-шамычлан тамлен ончаш темлыш.
Чыланат сеҥыше улыт!
Ынде ик эн тӱҥжым ойлена. Ме кочкыш конкурсым чылт конкурс семынжак шына эртаре. Тушто ончыл верлаш лекше-влакым ойырат. А ме вес корно дене кайышна да лу участницым чылаштымат сеҥыше семын палемдышна! Вет кажныжын кочкышыжо моткоч тамле лийын.
Шарналтен пайдаланат, шонена
Конкурсым иктешлыме мероприятийыш кочкышыштым ямдылен кондаш озавате-влаклан чот тыршашышт, ятыр вийыштым да жапыштым пытарашышт логалын гынат, нуно мӧҥгышкышт куаныше каеныт, шонена. Вет спонсор, газетнан йолташыже «Плёс» фирме, нунылан путырак чапле пӧлекым ойырен. Сандене ынде участнице-шамыч кӱмыж-совлам мушмышт, пӧртым эрыктымышт годым кажне гана мемнам да конкурснам шарналтат манын шонена.
Конкурсышкына ушнышо-влаклан чылаштлан эше ик гана кугу таум ойлена. Ончыкыжымат тыгаяк чолга, чулым лийын кодса! Газетна дене умбакыжат пеҥгыде кылым кучаш тӱҥалыда манын ӱшанена!
Любовь Камалетдинова
Михаил Скобелевын фотожо.
