УВЕР ЙОГЫН

«У шӱдырыштӧ» – мемнан Маша

Мураш йӧратыше-влаклан тыгай конкурс Россий Обороно министерствын полшымыж дене «Звезда» телеканалыште  эрта.

«У шӱдыр» – кугу музыкальный таҥасымаш. Тушко Российын 85 субъектше гыч участник-влак ушнат. Конкурсын площадкыштыже чыла регион гыч эн талантан  ӱдыр-рвезе-влак мастарлыкым ончыктат. 

Марий Элын чапшым Мария Радецкая аралаш тӱҥалеш.

Машалан кызыт — 22 ий. Тудо изинекак мураш йӧрата. Школ деч вара Мария И.С.Палантай лӱмеш тӱвыра да сымыктыш колледжыште тунемын, а кызыт МарГУ-што шинчымашым пога да Кужэҥер районысо тӱвыра пӧртыштӧ пашам ышта.

Муро дене илаш, тӱрлӧ нелылыкым сеҥаш куштылго, — манеш тудо. — Мылам йоча-влак дене пашам ышташ, нуным мураш туныкташ келша. Шкеат ава улам. Костя эргына кушкеш. Тудын дене жапым пайдалын эртараш тыршем. Конкурсышто сеҥышыш лектам гынат, сеҥымашем тудлан пӧлеклем. 

Конкурсын икымше туржо таче, 31 декабрьыште, а полуфинал ден финалже 2 гыч 4 январьыште лийыт. Тиде жапыштак телевизорым ончышо-влаклан  кугу йӱклымаш эрта.

Конкурсышто кок участник сеҥышыш лекшаш. 4 январьыште конкурс жюрин (чапланыше музыкальный эксперт-влак) иктешлымашыж почеш, а 7 январьыште телезритель-влакын йӱклымышт почеш  сеҥышым палемдат да нуным саламлат.

А.БАЙКОВА

Опубликовать в Одноклассники

Добавить комментарий