УВЕР ЙОГЫН

«Ужар» тукым кушкеш

Шукерте огыл тазалыкым пеҥгыдемдыме «Шап» комплексыште Марий Элысе школ лесничестве-влакын слётышт эртен.

Тудым Марий Элын Пӱртӱс поянлык, экологий да йырым-йырысе средам аралыме шотышто министерствыже Йоча эколого-биологический рӱдер дене пырля эртареныт. Тенийысе слёт кок кугу датылан, 70 ий ончыч мемнан элыште, лачшымак Брянск областьыште, икымше школ лесничестве ышталтмылан да 50 ий ончыч тыгай школ мемнан республикыште шочмылан пӧлеклалтын.

Тений слетыш 15 муниципальный образований гыч 35 школ лесничествын тунемшыже-влак миеныт. Чылаже 77 тунемше да 30 школ вуйлатыше лийыныт. Нуным саламлаш пӱртӱс поянлык, экологий да йырым-йырысе средам аралыме шотышто министр А.Киселев, образований да науко министр Н.Адамова, тыгак  профильный организацийла гыч вуйлатыше-влак  миеныт. Слётын программыже оҥай лийын. Ончыч «йыргеше ӱстелыште» школ лесничестве-влакын пашаштым иктешленыт да ончыкылан паша радамым палемденыт. Вара тунемше-влак тӱрлӧ конкурсышто, команде дене модмаште участвоватленыт, «чодыра многоборьеште» таҥасеныт. Кажныже республикысе школ лесничествын 50 ияш лӱмгечыжлан пырдыж газетым ямдылен, «Мӧҥгысӧ пашам» ончыктен.

Кок кечаш паша лектышым иктешлымеке, ойыртемалтше команде-влакым  палемденыт. Икымше верыш Кужэҥер районысо Руш Шой школ лесничестве лектын. Кокымшо ден кумшо Киров областьысе Сосновка ялысе гимназий ден Советский районысо Роҥго школ лийыныт.  

С.НОСОВА

Снимкыште: слётышто тӱрлӧ мастарлыкым ончыкташ логалын

Опубликовать в Одноклассники

Добавить комментарий