М.Шкетан лӱмеш Марий драме театр 19 майыште калыкым тыгай лӱман у спектакльым ончаш ӱжеш.
Тиде – марий драматург-влак коклаште увертарыме конкурсышто икымше верым сеҥен налше пьесе негызеш ямдылыме паша. Авторжо – калыклан сайын палыме марий поэт да кусарыше Анатолий Мокеев.
Жюри член-влак темлыме произведенийым возышын чын лӱмжым палыде лудыныт. Тудо «Маркан Тулий» манын ончыкталтын ыле. Эн ончычак эксперт-шамыч ойыртемалтше темым палемденыт. Усталык шӱлышан еҥ нерген пьесе марий литературышто икте-кокыт лийын гын веле? А тиде пьесын тӱҥ геройжо мурылан семым воза да шкеак мура. Вара семын почеламут корнылажат шкенжынак шочаш тӱҥалыныт. Тыгай самодеятельный автор марий коклаште шагал огыл. Нунын коклаште кугу усталык дене ойыртемалтшыжат ятырын лийыныт да улыт.
Жюрисе еҥ-влак тыгак моткоч устан возымо сылнымут корнылам палемденыт.
Пьесын лӱмжым режиссер вашталтыде коден. Тысе кычкыралтыш пале-влак тыглай огытыл, нуно возышо еҥын чон шортын кычкырымыжым ончыктат манын, умылен да шижын Р.Алексеев.
Темлыме спектакль Миклайын илыш пӱрымашыжым шерын лектеш. Самырык пагыт гыч тӱҥалын, ийготым погымо марте. Ача-ава суртышто, вара шке еш дене посна илыме нерген ала-куштыжо действий вигак шинчаончыко толеш, ала-куштыжо шарнымаш семын ончыкталтеш.
Тӱҥ верым вате-марий кокласе кыл, ваш умылымаш, йӧратымаш теме налеш. «Мыйын илышыштем чылажат шонымем семын лийын» манын, иктаж-кӧ ойлен кертеш мо ала? Миклаят шке чонжым пургедеш, тиде але вес ошкылжым радамлаш тырша. Мом тыге огыл ыштен… Молан шканже ласкалыкым муын огеш керт… Зинан олмышто Лена лиеш гын… Йодыш почеш йодыш. Вашмутшым гына муаш йӧсӧ.
Но тыште эше ик линий вияҥеш: илышыште айдемылан ӱшанле йолташ кӱлешак. Миклайын тыгайже коктын улыт. Нунын энертышышт деч посна тудо эртыме корнышто лекше нелылыкым сеҥен кертеш ыле мо ала. Женя ден Эдик тӱрлӧ илыш ситуацийыштат полшеныт, творчествыжым вияҥдашат шӱкалтышым ыштеныт…
Сценыште шуко муро йоҥга. Нунылан семым профессиональный композитор С.Маков возен. Спектакльым тичмаш налмаште Сергей Николаевичын лӱмын возымо семже вияҥдаш да келгемдаш полша.
Тӱҥ рольым самырык актер Иван Соловьев модеш. Сандене мурыжымат тудак мура. Лач тудо пургедеш усталык шӱлышан геройжын чонжым, ушыжым. Тиде артист шкенжын ончышыжым муын манын каласаш лиеш. Тугеже тиде спектакльышкат тудо толеш манын ӱшанен кодына.
С.БЕЛКОВА.
