С.Г.Чавайн лӱмеш калыкле книгагудышто самырык-влаклан «Родина» киноклуб почылтеш. Киноклуб годым отечественный кино-влакым ончаш да каҥашаш тӱҥалыт.
Сентябрьыште тӱнямбал да россий кинофестиваль-влакын лауреатше, Российын киновед да кинокритик-влакын гильдийыштын призше дене палемдалтше самырык кинорежиссёр Виталий Суслинын фильмже-влак ончыкталтыт. Автор да «ВГИК-Дебют» ретроспективым ышташ келшеныт. Режиссёр киноклубын пашашкыже онлайн ушна. Тыгай кинопоказыш ӱжыт: «Голова. Два уха» (26 сентябрь), «Папье-Маше» (28 сентябрь). Октябрьыште «Рапана», «Верблюжья дуга», кӱчык метражан «Ванька Тепляшин», «Шнырь» да «День простого человека» документальный фильм-влак ончыкталтыт. Сеансым 14 шагатлан эртараш палемдыме.
Уверым РФ кинематографист-влак ушемын киновед да кинокритик-влакын гильдийыштын членже, поэт, писатель да киносценарист Марина Копылова пуэн. Тудак киноклубым вӱда.
Л.СЕМЕНОВА
