20 январьыште Россий Федераций Пенсий фондын Марий Элысе пöлкаштыже фондым виктарышын алмаштышыже Игорь Захаров ден социальный выплатым палемдыме виктем начальникын алмаштышыже Геннадий Тарасов регионысо журналист-влаклан «Калыкым социально аралыме органла гыч Россий Пенсий фондлан кусарыме полыш мере-влак» теме дене пресс-конференцийым эртареныт. Тушко селектор видеокыл полшымо дене олаласе да районласе клиент службо-влакын пашаеҥыштат ушненыт.
– Федеральный законодательствыш пуртымо вашталтыш-влак дене келшышын, 2022 ий 1 январь гыч регионысо социальный аралымаш орган-влакын южо социальный полыш мере-шамычым палемдыме пашаштым мыланна пуымо. Рашемденрак каласаш гын, Пенсий фондлан Марий Элыште илыше 5653 еҥ шотышто мере-влакым кусарыме, – фондын ешартыш пашаж дене палдарыш Игорь Николаевич. – Ме ынде эше вич тÿшка еҥлан – йочан, пашам ыштыдыме, радиацийыш логалше, реабилитироватлыме еҥ, медицине палемдымаш почеш транспорт средстван лийше инвалид (инвалид йоча) да Россий Пенсий фонд гоч пенсийым налше военнослужащий-влаклан да нунын ешыштлан – пособийым, выплатым да компенсацийым палемдаш тÿҥалына. Марий Элыште нине выплатым ныл тÿшка еҥ налеш – республикыштына реабилитироватлыме-шамыч уке улыт.
Геннадий Николаевичын мутшо почеш, 2022 ий 1 январь гыч Россий Федераций Пенсий фондын органже-влак Марий Элыште тыгай социальный полыш мере-влакым пуат:
- Йочан пашам ыштыдыме еҥ-влаклан:
- мÿшкыран улмо да азам ыштыме шотышто ик гана тÿлыман пособийым;
- йоча шочмо годым ик гана тÿлыман пособийым;
- йочам эргылыкеш але ÿдырлыкеш налме годым ик гана тÿлыман пособийым;
- 1,5 ияш марте йочам ончымо шотышто тылзе еда тÿлыман пособийым;
- призыв почеш военнослужащийын мÿшкыран ватыжлан ик гана тÿлыман пособийым;
- призыв почеш военнослужащийын йочажлан тылзе еда тÿлыман пособийым.
- Военный-влаклан да нунын ешыштлан:
- коммунальный услугылан тÿлымылан компенсацийым;
- пöртым олмыкташ ик гана тÿлыман компенсацийым (10 ийлан 1 гана);
- общеобразовательный школышто тунемше йочан кеҥежым тазалыкшым пеҥгыдемдаш ий еда тÿлыман выплатым;
- икшывылан тылзе еда тÿлыман пособийым (военнослужащийын тулыкеш кодшо йочажым ончышо еҥлан);
- военный травме шотышто инвалидлан тылзе еда тÿлыман компенсацийым.
- Радиацийлан кöра начаремше тазалыкан граждан-шамычлан:
- Чернобыль АЭС-ыште, «Маяк» химкомбинатыште, Семипалатинскысе полигонышто аварий лиймылан кöра тазалыкым йомдарыше-шамычлан компенсацийым;
- радиоактивный лавыран кундемлаште пашам ыштымылан ий еда тÿлыман вознагражденийым;
- чрезвычайный ситуацийлан кöра инвалид лийше-влакын тазалыкыштлан ышталтше эҥгеклан пöртылтымö шот дене тылзе еда тÿлыман компенсацийым;
- чрезвычайный ситуацийлан кöра пашам ыштен кертдыме лийше-шамычын тазалыкыштлан ышталтше эҥгеклан пöртылтымö шот дене тылзе еда тÿлыман компенсацийым;
- ешартыш отпусклан ик гана тÿлыман выплатым да тазаҥдыме процедурлан компенсацийым;
- 14 ияш марте йоча-влаклан налме кочкыш продуктын роскотшылан тылзе еда тÿлыман компенсацийым;
- йоча-влаклын кочмыштлан тылзе еда тÿлыман компенсацийым;
- радиоактивный кундемла гыч куснымо годым ыштыме роскотлан компенсацийым да ик гана тÿлыман выплатым;
- пукшышым йомдарыме годым ешын пашам ыштен кертдыме еҥже-шамычлан тылзе еда тÿлыман компенсацийым;
- колышым тойымылан пособийым;
- пукшышым йомдарыме шотышто ик гана тÿлыман выплатым.
- Транспортан инвалид-влаклан:
- ОСАГО-лан компенсацийым.
Пенсий фонд у выплате, компенсаций да пособий-влакым ведомство-шамыч кокласе кыл кÿшеш палемда да социальный полыш мере-влакым тымарте налше-шамычлан палемдыме выплатым йодмашыште ончыктымо реквизитыш автоматически колта.
Айдемын иктаж пособийым налаш праваже уло гын, 2022 ий 1 январь гыч тидын нерген йодмашым Россий Пенсий фондын клиент службыштыжо але илыме кундемысе МФЦ-н офисыштыже пуышаш.
Икмыняр жап гыч выплатым налаш палынак куштылго лиеш, молан манаш гын Пенсий фонд гражданинын полышлан праважым социальный казначействе принцип почеш пеҥгыдемда – чыла гаяк уверым шкеак пога. Мутлан, лишыл жап гыч колышо военнослужащий-влакын ешыштлан коммунал услугылан тÿлымö нерген документым пел ийлан ик гана кондаш огеш кÿл лиеш – Пенсий фонд тидым илыме-коммунал озанлыкын увер системыж гоч шкеак рашемдаш тÿҥалеш. Моло социальный полышым налме шотыштат шукыж годым йодмашым гына пуыман лиеш.
Фонд чыла йодмашым 5-10 паша кечыште онча да выплатым палемдыме деч вара оксам тынарак жап гыч счётыш колта.
Социальный полыш мере-влакын кугытышт ий еда индексироватлалтеш. 2022 ий 1 январь гыч воинский порысым шуктымо годым колышо военнослужащий ден военный сборыш налме военнослужащий-влакын йочаштлан, ешысе еҥыштлан выплатым 4 процентлан кугемдыме. Фондлан кусарыме моло выплатым 1 февраль гыч индексироватлаш палемдыме.
«Марий Элыште Россий Пенсий фондлан кусарыме мере-шамыч шотышто икымше выплате-влакым кондыштарыше организацийла гоч 15 январь гыч пуаш тÿҥалме, кредит организацийла гоч – 17 январь гыч. Тиде выплате – январьлан, тудым шушаш тылзын гына пуышаш ыльна. Февральыште йодмашым январь-февральыште пуышо-шамыч налыт, да мартыште чыла выплатым тÿлымö ончычсо радамыш пöртылына», – рашемдыш И.Захаров.
Кö мом огеш умыло гын, чыла йодышым Россий Пенсий фондын Марий Элысе пöлкажын увер-справке службыжын 8-800-600-02-15 номеран телефонжо але Калык дене пашам ыштыше ик кыл-рÿдерын 8-800-600-00-00 номеран телефонжо дене рашемдаш лиеш. Фондын сайтше: pfr.gov.ru.
Маргарита ИВАНОВА
Авторын фотожо
