Марий Элын паша да социальный аралымаш министрже Елена Таникова ден Кугыжаныш Погынжын председательже Михаил Васютин «Кичиер» санаторийысе инфраструктурын тазалыкым пеҥгыдемдыме пагытлан мынярак ямде улмыжым тергеныт.
Нуно номер ден медицине кабинет-шамычым, инфраструктурым онченыт, тыгодым кугу тӱткышым сайын да пайдалын каныме йӧнлан ойыреныт.
«Кичиер» санаторий – тиде каныме вер гына огыл, тыгак социально полшымо кӱлешан организаций. Ме тыште кажне уналан, поснак СВО участник ден тудын ешыжлан, жапым пайдалын эртараш, тазалыкым пеҥгыдемдаш келшыше йӧным ышташ тыршена», – палемден Елена Таникова.
Вуйлатыше-шамыч санаторийын материально-технический базыжым умбакыжат вияҥдыме да услугым ыштыме качествым саемдыме йодышлам лончыленыт.
«Кичиер» ончыкыжымат регионыштына куатым погымо да тазалыкым пеҥгыдемдыме ик эн сай санаторий лиеш манын ӱшанем. Мемнан тӱҥ задачына – кугыжаныш полыш да тӱткыш шотышто тӱнен илыше-влаклан кӱлешан чыла йӧным ышташ», – палемден марий парламентын спикерже.
2026 ийыште Паша да социальный аралымаш министерстве регионысо льгото-влак дене пайдаланыше 1300 еҥлан, тыгак СВО участник-шамыч ден нунын ешыштлан, санаторий да курорт шотан организацийлаште тазалыкым пеҥгыдемдаш йӧным ышташ палемден.
Маргарита ИВАНОВА.
Елена Таникован ТГ-каналже гыч налме фото.
