Марий йӱла почеш:
Кумалтышын чинче тушыжо:
«Юмо Пӱрышӧ! Таче кечым илаш полшенат, таза илышым пуэнат. Тыланет тау! Ала пӱрымӧ деч уто ойым ойленам, ала Юмын пӱрымӧ вияш илыш тӱлем туржынам, индыренам, ала кучылт моштен омыл, ала Юмылан уто пашам ыштенам, пӱрымӧ семын вияш дене илен моштен омыл. Юмо-Пӱрышӧ! Турко, сулыкеш ит кодо. Йӱдшым сайын, тазан мален, канен эртараш пӱрен пу. Пӱрымаш илыш вуй Юмем! Таче илымашем Тӱҥ Кугу Юмылан виктарен шого, у кечылан илаш пӱрымашым йодын шого!
«Ош Сандалык ончылно» книга гыч налме. Йошкар-Ола,2012 ий.
Черке йӱла почеш:
7 – Юмын Авалан Поро пӱрымашан Уверым пуымо кече.
8 – Архангел Гавриилын погынжо.
Палаш уто огыл:
Преподобный Серафим Саровскийым шарныше-влакын ойлымышт почеш, тудо чынжымак юмылан чот ӱшаныше да чыла йӱлажым шуктышо айдеме лийын. Лач тудо чоныш шӱлык толмо годым, тидын ваштареш мом ышташ кӱлмӧ нерген туныктен ойлен. Библий почеш, шӱлык – кугу сулык. Эн ончыч шӱлыкын амалжым, кушеч лекмыжым рашемдыман. Саровский святой Варсанофийын ойжылан эҥертен, а тудыжо туныктен: икымше тӱрлӧ шӱлык вийдымылык гыч лектеш, а молышт – бес-шамыч деч. Сандене шӱлык гыч лекташак тыршыман, вет тудо тынар шуко сулык шонымашым ылыжта. Чыла осалжат лач шӱлык гычак лектыт, пуйто… Саровский ойлен: ойгырен илаш корно огыл, молан манаш гын Христос чыла сеҥен лектын, Адамымат ылыжтен, Евамат утарен, колымашымат пытарен…»
Калык пале почеш:
Вӱдшор тӱвыргын эрта, вӱд шуко – кеҥеж шокшо лиеш.
7 апрельыште игече ночко – шушаш шыжым поҥго шуко лиеш.
7 апрель марте вараксим-влак чоҥештен толын огытыл гын, шошо вараш толеш да йюалге лиеш.
Шыҥа лектеш, игече палынак левешта.
Кас каваште шӱдыр шуко – кылме эше лиеш.
Кайык-влак ӱлнӧ чоҥештылыт, кычкырлат – эше поран толеш.
Шарнаш кодшо ой:
Пӱртӱс нигунам ок вашке, сандене чылажат жапыштыже толеш.
Вес еҥын йолчиемжым чиен ончыде, нигунам тудым ида мыскыле.
Вес еҥым сеҥымаш вийым ешара, а шкем сеҥымаш – лӱддымылыкым.
Илыш пеш кӱчык, сандене жапым йомдарыман огыл, илаш да илышлан куаныман.
Ушан айдеме шке шинчымашыжым пойдарен толеш, а мудреч кажне кечын утыжым ӱштеш.
Виян йӧратымаш южылан вийым ешара, а кӧлан гын – лӱддымылыкым.
(Китай мудреч Лао-Цзы)
С.Носова ямдылен
