Калык переписьым интернет полшымо дене эртыме шотышто Марий Эл ик эн ончылно кая.
Переписьын икымше арняштыже Российыште илыше 14 миллион калыкым возен налыныт, нунын кокла гыч 11 миллион наре еҥ «Госуслуги» портал гоч эртен. Ушештарыман, тений переписьым кум йӧн дене эрташ лиеш: «Госуслуги» портал гоч, переписчикым мӧҥгышто вучен шукташ але стационар участкыш шке мияш лиеш. Росстат вуйлатышын алмашышыже Павел Смеловын ойлымыж почеш, переписьым эртыме шотышто ончыл верыш Тула ден Сахалин область, Мордовий ден Марий Эл республикыла, Ямал-Ненец автономный округ лектыныт.
Марий Элыште калык переписьым эртыме дене кылдалтше «шокшо линият» пашам ышта. Тудо «Ростелеком Контакт-рӱдер» компаний пелен почылтын, номерже тыгай: 8-800-707-2020. Кажне кечын 9 гыч 21 шагат марте йыҥгырташ лиеш.
Переписчик-влак лӱм дене пачерлаш мошенник-влакын миен кертмышт дечат калыкым шижтарыман. Кеч тыгай случайже мемнан элыште эше ик гана веле лийын, палемден Павел Смелов. Мошенник-влак переписчик семын пачерыш пураш толашеныт, но пачер оза-влак полицийым ӱжыктеныт. Сандене ушештарыман: переписчик-влакын посна формышт уло: тиде – волгыдым койыктышо жилет, калык переписьын логотипше дене фирменный шарф, сумка, планшет, тыгак паспорт дене пырля ончыкташ келыштарыме лӱмым палдарыше удостоверений. Шижтарыде ок лий: переписчик пачерыш толын гын, тендан деч паспортым йодшаш огыл. Йодышыжо-влаклан нимогай документым ончыктыде вашмутым пуыман. Кузе вашештеда, тугак серат. Тыгак республикыште переписьым эртараш 184 волонтёр полшат. Но нуно тӱҥ шотышто станционар участкылаште да шуко функциян рӱдерлаште пашам ыштат.
Перепись 14 ноябрь марте шуйна. Сандене переписчик-влак пачер ден суртлаш ты кече марте миен кертыт.
С.Носова
