Йошкар-Олаште Россий Федерацийын прокуратур пашаеҥжын кечыжлан пӧлеклалтше торжественный мероприятий эртен.
Республик вуйлатыше Юрий Зайцев пашаеҥ ден ветеран-влакым пайремышт дене саламлен. Да палемден:
– Марий Элын прокуратуржо – тиде преступность да коррупций ваштареш кучедалаш ямде профессионал-влакын виян командышт. Нацпроект ден кугыжаныш программе-влак дене кылдалтше мероприятийлам кузе шуктымым умбакыже тергыман. Тиде паша кӱлешан кугыжаныш задаче-влакым шукташ бюджет гыч ойырталтше оксам пайдалын кучылтшашлан кӱлеш.
Погынышо-влак Россий президент Владимир Путин ден РФ-н генеральный прокуроржо Александр Гуцанын видеосаламлымашыштым колыштыныт.
Тыгак Кугыжаныш Погын председатель Михаил Васютин саламлен.
– Марий Элын прокуратуржо ончыкыжымат шке миссийжым пайдалын шукташ тӱҥалеш да правовой кугыжанышым вияҥдымашке, еҥ-влакын илышыштым саемдымашке кугу надырым пышта манын ӱшанена, – палемден тудо.
Республикын прокуроржо Илдус Нафиков регионын исполнительный ден законодательный кучемже-влакын еҥыштлан келшен пашам ыштымылан тауштен.
Погынышо-влакым пайремышт дене Марий Элын тӱҥ федеральный инспекторжо Сергей Беляков саламлен.
Торжественный мероприятий жапыште Юрий Зайцев республикысе прокуратурышто тыршыше икмыняр пашаеҥлан наградым кучыктен.
Марий Эл вуйлатышын пресс-службыжын уверже негызеш Любовь Камалетдинова ямдылен.
