📚✍️19-23 майыште Ханты-Мансийскыште Финн-угор писатель-влакын кумшо конференцийышт эрта.
Конференций финн-угор йылмыла дене возышо писатель ден поэт-влакым, книга савыктыш пашаеҥым, йылмым, сылнымутым, этнографийым шымлыше шанчызым, тыгак книгагудо ден тунемме тӧнежла гыч специалист-влакым чумырен.
Конференцийыште финн-угор сылнымутышто лекше пӱсӧ йодышлам, самырык автор-влакым кумылаҥдыме, шочмо йылмыла дене савыктыме книга дене кылдалтше темылам каҥашат.
Мероприятийын программыже поян. Уна-влакым пленарный погынымаш, книга ончер-влак, «йыргешке» ӱстел ден тӱрлӧ вашлиймаш, сылымут унагудо ден усталык лабораторий-шамыч вучат.
Марий Эл гыч Финн-угор писатель-влакын конференцийышкышт «Ончыко» журналын редакторжо, серызе Эрик Петров, поэт ден писатель-влак Лидия Иксанова, Геннадий Сабанцев да Анатолий Ишалин каеныт.
📸 Марий книга савыктышын воткыл лаштыкше гыч налме фото.
